Միջազգային
Եվրոպական երկրները ցանկանում են ներգրավվել Ուկրաինայի վերաբերյալ բանակցություններին
Ֆրանսիան, Գերմանիան, Միացյալ Թագավորություններն ու մի շարք այլ եվրոպական երկրներ հայտարարել են, որ Ուկրաինայի ճակատագրի վերաբերյալ ցանկացած ապագա բանակցություններում Եվրոպան պետք է ներգրավված լինի։ Միաժամանակ ընդգծել են, որ միայն անվտանգության երաշխիքներով արդար համաձայնագիրը կարող է ապահովել կայուն խաղաղություն. գրում է Guadrian-ը։
«Ուկրաինան և Եվրոպան պետք է ներգրավված լինեն ցանկացած բանակցություններում», – ասվում է 7 եվրոպական երկրների և Եվրոպական հանձնաժողովի կողմից Փարիզում արտգործնախարարների հանդիպումից հետո տարածված համատեղ հայտարարության մեջ։
«Ուկրաինան պետք է ստանա հզոր անվտանգության երաշխիքներ։ Արդար և կայուն խաղաղությունը Ուկրաինայում անհրաժեշտ նախապայման է ամուր տրանսատլանտյան անվտանգության համար»,– նշված է հայտարարության մեջ։
Եվրոպական երկրները շեշտել են, որ ակնկալում են այս հարցի շուրջ քննարկումներ անցկացնել ԱՄՆ-ի դաշնակիցների հետ։
Հանդիպումը տեղի է ունեցել այն բանից հետո, երբ ԱՄՆ նախագահ Դոնալդ Թրամփը հայտարարել էր, որ զրուցել է Ռուսաստանի նախագահ Վլադիմիր Պուտինի հետ, և որ երկուսը պատրաստ են անհապաղ սկսել բանակցություններ Ուկրաինայի պատերազմը դադարեցնելու համար։
Ըստ Guardian-ի՝ այս զարգացումները լուրջ անհանգստություն են առաջացրել Եվրոպայում, քանի որ Թրամփն ու Պուտինը, ըստ եվրոպական առաջնորդների, կարծես բանակցում են մայրցամաքի անվտանգության ապագայի շուրջ՝ առանց Եվրոպայի ներգրավվածության։
«Ուկրաինայում արդար և կայուն խաղաղություն չի կարող լինել առանց եվրոպացիների մասնակցության», – ասել է Ֆրանսիայի արտգործնախարար Ժան-Նոել Բարոն Փարիզում կայացած հանդիպման ժամանակ։ Հանդիպմանը մասնակցել են Ֆրանսիայի, Մեծ Բրիտանիայի, Գերմանիայի, Լեհաստանի, Իտալիայի, Իսպանիայի, Ուկրաինայի և Եվրոպական հանձնաժողովի ներկայացուցիչները։
Գերմանիայի արտգործնախարար Աննալենա Բերբոքը և Իսպանիայի արտգործնախարար Խոսե Մանուել Ալբարես Բուենոն ընդգծել են, որ Ուկրաինայի վերաբերյալ որևէ որոշում չի կարող կայացվել «առանց Ուկրաինայի», իսկ ԵՄ երկրները պետք է հանդես գան միասնական դիրքորոշմամբ։
«Մենք ցանկանում ենք Ուկրաինայում խաղաղություն, բայց ցանկանում ենք, որ անարդար պատերազմն ավարտվի արդար խաղաղությամբ», – ասել է Ալբարես Բուենոն։
Լեհաստանի արտգործնախարար Ռադոսլավ Սիկորսկին հանդիպման ընթացքում նշել է, որ «ԱՄՆ-ի հետ շարունակական համագործակցությունը» քննարկվող հարցերի թվում է։
«Մեր մայրցամաքի անվտանգության լավագույն երաշխիքը մնում է սերտ տրանսատլանտյան համագործակցությունը», – հավելել է Սիկորսկին։
