Չինաստանի պաշտպանական գիտության, տեխնիկայի և արդյունաբերության պետական ​​վարչությունը հավաքագրում է աշխատակիցներ 2024 YR4 աստերոիդից մոլորակային պաշտպանության հաստիքների համար, որը կարող է հարվածել Երկրին 2032 թվականին, Ֆեյսբուքի իր էջում գրել է Հիդրոօդերևութաբանության և մոնիթորինգի կենտրոնի տնօրեն Լևոն Ազիզյանը։ 

Ինչպես հայտնում է South China Morning Post թերթը, աստերոիդի հայտնաբերումից մի քանի շաբաթ անց Չինաստանի պաշտպանական գիտության, տեխնիկայի և արդյունաբերության պետական ​​վարչության հատուկ նախագծերի կենտրոնը հրապարակել է հայտարարություն աշխատակիցների հավաքագրման մասին, որում նշված է մոլորակային պաշտպանության հաստիքների երեք թափուր աշխատատեղ։

Պարբերականը նշում է, որ կենտրոնը, որը պատասխանատու է օդատիեզերական ճարտարագիտական ​​հետազոտությունների և Երկրի դիտարկման համար, հավաքագրում է շրջանավարտների՝ աստերոիդների մոնիտորինգը ուսումնասիրելու և վաղ նախազգուշացման մեթոդներ ստեղծելու համար։

Նախօրեին Չինաստանի գիտությունների ակադեմիայի Տիեզերական գիտության ազգային կենտրոնը China Science Daily թերթին հայտնել է, որ 2024 YR4-ի Երկրի հետ բախվելու հավանականությունը դինամիկ կերպով կշտկվի, ուղեծրային դիտման տվյալների կուտակմանը զուգընթաց: Ընդ որում՝ գիտնականները մինչև այս տարվա ապրիլ ժամանակ ունեն աստերոիդի դիտարկումներ անցկացնելու համար, որից հետո հնարավորությունների հաջորդ պատուհանը կբացվի միայն 2028 թվականին, երբ աստերոիդը նորից կմոտենա Երկրին։

Եթե ​​աստերոիդն իսկապես բախվի Երկրին, ամենահավանական սցենարն այն է, որ այն ընկնի օվկիանոս: Եթե ​​դա տեղի ունենա բաց ծովում, մարդկանց վրա էական ազդեցություն չի լինի։ Այնուամենայնիվ, եթե այն ընկնի ափամերձ գծին մոտ, դա կարող է հանգեցնել ցունամիի առաջացման, որը կարող է ազդել ափամերձ քաղաքների վրա: Եթե ​​աստերոիդը ընկնի ցամաքի վրա, օդում դրա քայքայման հետևանքով առաջացած հարվածային ալիքը, ջերմային ճառագայթումը և լույսի ճառագայթումը կարող են ոչնչացնել միջին քաղաքի չափ տարածք։

Ներկայումս նման աստերոիդներից պաշտպանության ամենաառաջադեմ տեխնիկական միջոցը տիեզերանավի արձակումն է, որը մեծ արագությամբ կբախվի աստերոիդին՝ ստիպելով նրան փոխել իր ուղեծիրը և թռչել Երկրի կողքով: Բացի այդ, այսօր ուսումնասիրվում են նաև այնպիսի տեխնիկական մեթոդներ, ինչպիսիք են գրավիտացիայի և լազերային աբլյացիայի միջոցով աստերոիդների ներգրավվումը