Արգենտինան հետևում է ԱՄՆ-ին Առողջապահության համաշխարհային կազմակերպությունից դուրս գալու հարցում, լրագրողներին ասել է երկրի նախագահի խոսնակ Մանուել Ադորնին։
«Միլեյը հանձնարարել է դադարեցնել Արգենտինայի անդամակցությունն Առողջապահության համաշխարհային կազմակերպությանը, որի աշխատանքը խոր տարաձայնություններ է առաջացրել առողջապահական համակարգի կառավարման հետ կապված և հատկապես համաճարակի ժամանակ:
Մենք՝ արգենտինացիներս, թույլ չենք տա միջազգային կազմակերպությանը միջամտել մեր ինքնիշխանությանը, առավել ևս՝ մեր առողջությանը»,- ասել է Ադորնին։
Նա հավելել է, որ Արգենտինան ԱՀԿ-ից ֆինանսավորում չի ստանում, այդ պատճառով կազմակերպությունից դուրս գալը չի հանգեցնի երկրի համար միջոցների կորստի և չի ազդի ծառայությունների որակի վրա:
Ավելի վաղ ԱՄՆ նախագահ Դոնալդ Թրամփը հրաման էր ստորագրել ԱՀԿ-ից երկրի դուրս գալու մասին։ Նոր վարչակազմը կարծում է, որ ԱՀԿ-ն անարդյունավետ է, քաղաքական ազդեցության տակ է և չափազանց մեծ ֆինանսավորում է պահանջում Միացյալ Նահանգներից։