Միջազգային
Ռուս դիվանագետները ներխուժել են բրիտանական խորհրդարանի փակ հատված․ Guardian
Մի քանի ռուս դիվանագետ, որ այցելել են Լոնդոնի բրիտանական խորհրդարանի շենք, մի պահ առանձնացել են խմբից և մտել Լորդերի պալատի փակ տարածքներ․ հաղորդում է բրիտանական Guardian թերթը՝ հավելելով, որ անվտանգության ծառայությունը նրանց դուրս է հանել այդտեից։
Թերթը գրում է, որ միջադեպն «անհանգստացրել է անվտանգության ծառայության աշխատակիցներին և երկու պալատների խոսնակների մոտ զգուշություն առաջացրել»։ Դեպքը տեղի է ունեցել դեկտեմբերին՝ Սուրբ Ծննդյան նախօրեին։
«Ամենայն հավանականությամբ, նրանք պարզապես ուզում էին Կրեմլում պարծենալ, որ «ներխուժել են բրիտանական խորհրդարան»», - մեջբերում է թերթը խորհրդարանի իր աղբյուրը։ «Դժբախտաբար, ձևականորեն դա ճշմարիտ է, բայց նրանց բռնել են մինչև որևէ վնաս հասցնելը»։
Այնուամենայնիվ, բրիտանական կառավարությունը այս միջադեպին շատ լուրջ է վերաբերվել և երկու պալատների պատգամավորներին ուղարկվել են նամակներ՝ զգուշացնելով, որ ռուս դիվանագետներին խորհրդարանի շենք նույնիսկ մասնավոր կարգով չհրավիրեն։
Մինչ այժմ անհասկանալի է՝ ռուսները մասնակցել են էքսկուրսիայի, որը կազմակերպվել է որևէ աշխատակցի կամ պատգամավորի անձնական նախաձեռնությամբ, թե գնել են տոմս որպես սովորական զբոսաշրջիկ։
