Ինչպես հաղորդում է «ISNA» գործակալությունը Իրանի նախագահ Մասուդ Փեզեշքիանը Ռուսաստանի փոխվարչապետ Վիտալի Սավելևի հետ հանդիպմանը հայտարարել է, որ Ռեշտ-Աստարա երկաթուղագծի իրականացումը Իրանի և Ռուսաստանի միջև կնքված համաձայնագրերի առաջնահերթություններից է, և իրանական կողմը վճռական է այդ հարցում։
«Իրանը հավատարիմ է այդ համաձայնագրի դրույթներին, և ռուսական կողմը կարող է սկսել երթուղու պլանավորումը և հնարավորինս շուտ նախապատրաստվել նախագծի իրականացմանը: Պայմանագրով մենք ձեռք կբերենք մայրուղու հողը և սահմանված ժամկետում կտրամադրենք փաստաթղթերն ու պարտավորությունները»,- ասել է Իրանի նախագահը։
Հանդիպմանը Ռուսաստանի փոխվարչապետը Իրանի նախագահին է փոխանցել Պուտինի ողջույնները՝ նրան հրավիրելով 2025թ․ սկզբին այցելել Ռուսաստան։ Ըստ իրանական պարբերականի՝ ՌԴ փոխվարչապետը հայտնել է, որ Ռուսաստանի կառավարությունը պատրաստ է դրան. ուղևորությունը, բանակցությունները և համաձայնագրերը նախապատրաստվում են։
«Ռուսական կողմն ապահովել է անհրաժեշտ վարկային գիծ և, Հյուսիս-Հարավ միջանցքի հարցում համագործակցելով Ադրբեջանի կառավարության հետ, ցանկանում է իրագործել այդ համաձայնագիրն Իրանի հետ: Մենք ցանկանում ենք, որ այդ համաձայնագիրը կյանքի կոչվի»,- ասել է ՌԴ փոխվարչապետը։
Նա նշել է, որ Ռուսաստանի կառավարությունը ցանկանում է արագացնել այս համաձայնագրի իրականացման գործընթացը և հստակեցրել, որ Ռուսաստանն ու Ադրբեջանը պայմանավորվել են, որ այդ երկաթուղային գծի մի մասը, որը գտնվում է Ադրբեջանի տարածքում, պետք է արդիականացվի և թարմացվի, և իրենք նաև ցանկանում են, որ Իրանի կառավարությունը դա անի, որպեսզի օգնի ապահովել անհրաժեշտ միջոցներ իր երկրում այդ գծի արդիականացման և թարմացման համար:
Ռուսաստանի փոխվարչապետը ակնկալիք է հայտնել, որ Աստարա-Ռեշտ երկաթուղային համաձայնագրի իրականացմամբ կողմերը կկարողանան հասնել երկու երկրների միջև 15 մլն տոննա ապրանքների փոխադրման հզորությանը:
