Միջազգային
Գերասիմովը «չափազանց արտասովոր» հեռախոսազրույց է ունեցել ամերիկյան կողմի հետ. NYT
ABC-ն և New York Times-ը հայտնում են, որ Ռուսաստանի Գլխավոր շտաբի պետ Վալերի Գերասիմովը անցյալ շաբաթ «չափազանց արտասովոր» հեռախոսազրույց է ունեցել ԱՄՆ-ի Շտաբի պետերի միացյալ շտաբի ղեկավար, գեներալ Չարլզ Բրաունի հետ:
Ինչպես հայտնում է ABC-ն, Գերասիմովը նոյեմբերի 27-ին զանգահարել է Բրաունին և զգուշացրել Միջերկրական ծովում ռուսական ռազմանավերից հիպերձայնային հրթիռների առաջիկա փորձնական արձակման մասին։ Նա ամերիկյան նավերին առաջարկել է նահանջել անվտանգ հեռավորության վրա։ Դեկտեմբերի 3-ին ՌԴ պաշտպանության նախարարությունը հրապարակավ հայտարարել է այս փորձարկման մասին, որը տեղի է ունեցել Միջերկրական ծովի արևելյան հատվածում։
Ըստ New York Times-ի, Գերասիմովը նաև ասել է իր ամերիկացի գործընկերոջը, որ նոր հրթիռի փորձարկումը, որը Կրեմլն անվանում է «Օրեշնիկ», ծրագրվել է շատ ավելի վաղ, քան Բայդենի վարչակազմը թույլ է տվել Ուկրաինային օգտագործել ATACMS-ը: Պուտինը հրթիռային հարվածը ներկայացրել է որպես ռուսական տարածքի վրա ATACMS առաջին հարձակման պատասխան։
ABC-ն և New York Times-ը հայտնում են զրույցի բովանդակությունը Պենտագոնի անանուն աղբյուրներից։ Բրաունի մամուլի քարտուղար կապիտան Ջերիլ Դորսին հաստատել է զանգը և հավելել, որ «գեներալ Գերասիմովի խնդրանքով գեներալ Բրաունը համաձայնել է իր նախաձեռնությամբ չհրապարակել զանգի բովանդակությունը», - մեջբերում է NYT-ը։
Մոսկվան այս խոսակցության մասին դեռ ոչինչ չի հաղորդում։
