Կյանքի ժամանակակից ռիթմը հաճախ խրոնիկական սթրեսի մեջ է գցում մարդկանց, մինչդեռ, սնունդն այն գործիքներից մեկն է, որը կարող է աջակցել մարդուն, ասել է թերապևտ և սննդաբան Նատալյա Անդրեևան:
Lenta.ru-ի հետ զրույցում նա նշել է ապրանքներ, որոնք կարող են օգնել նվազեցնել սթրեսի մակարդակը։
Առաջին հերթին, նա առանձնացրել է մածունը, կեֆիրը, թթու կաղամբը։ Անդրեևան բացատրել է, որ մարդու հուզական վիճակն ուղղակիորեն կապված է աղիների վիճակի հետ, որտեղ արտադրվում է սերոտոնինի մինչև 90 տոկոսը: Ֆերմենտացված մթերքներում առկա պրոբիոտիկները նպաստում են առողջ միկրոֆլորային՝ օգնելով մարմնին ավելի լավ հաղթահարել սթրեսը, ասել է նա՝ կոչ անելով սննդակարգում ներառել օրական առնվազն մեկ չափաբաժին մածուն կամ կեֆիր և շաբաթական 3-4 անգամ որպես կողմնակի ճաշատեսակ ավելացնել թթու կաղամբը:
Մեկ այլ ապրանք, որը կարող է ձեզ ուրախացնել, դա մուգ շոկոլադն է: Այն ոչ միայն հաճույք է պատճառում, այլև բարելավում է ուղեղի աշխատանքը՝ նվազեցնելով սթրեսի հիմնական հորմոնի՝ կորտիզոլի մակարդակը, ասել է սննդաբանը։ Նա հավելել է, որ շոկոլադի մեջ պարունակվող ֆլավոնոիդները բարելավում են արյան շրջանառությունը և օգնում կառավարել սթրեսը։ Բժիշկը խորհուրդ է տվել ընտրել առնվազն 70 տոկոս կակաոյի պարունակությամբ շոկոլադ և օրական ուտել մի քանի կտոր օգուտներ ստանալու համար՝ չվնասելով կազմվածքը:
Արժե նաև շաբաթական առնվազն երկու անգամ սննդակարգում ներառել յուղոտ ձուկ՝ սաղմոն, սկումբրիա, ծովատառեխ, համոզված է Lenta.ru-ի զրուցակիցը։
