Աբխազիայի նախագահ Ասլան Բժանիան լքել է Սուխումը ընդդիմության վերջնագրի ֆոնին։ Այս մասին Telegram-ի ալիքում հայտնել է Աբխազիայի ղեկավարի մամուլի ծառայությունը։
Ընդդիմությունը պահանջում է նրա հրաժարականը։
«Ներկայումս Ասլան Բժանիան գտնվում է հայրենի Տամիշ գյուղում»,- ասվում է հաղորդագրության մեջ։
Պետության ղեկավարի մամուլի ծառայությունը հերքել է ընդդիմության տարածած տեղեկությունը, թե ժողովրդին դիմելուց հետո Բժանիան «տեղափոխվել է ռուսական ռազմաբազայի տարածք»։
Ավելի վաղ՝ նոյեմբերի 15-ին, ընդդիմությունը հայտարարել էր, որ Բժանիային մեկ ժամ ժամանակ է տալիս հրաժարական տալու համար, հակառակ դեպքում ցուցարարները կգնան ՆԳՆ շենք, որտեղ նա գտնվում էր այդ պահին։ Նույն օրը երեկոյան Բժանիան կոչ է արել ժողովրդին չտրվել սադրանքներին։ Նա հայտարարել է, որ կմնա Աբխազիայում և կշարունակի աշխատել, իսկ առաջնահերթ խնդիրների թվում նշել է «նոյեմբերի 15-ին տեղի ունեցածի հետևանքները վերացնելու ջանքերը»։
Բժանիան նաեւ հայտնել է, որ բանակցություններ են ընթանում ընդդիմության հետ։
«Աբխազիայի Հանրապետության նախագահը, վարչապետը, նախարարությունների և գերատեսչությունների ղեկավարները մնում են իրենց տեղերում և կշարունակեն աշխատել»,- ընդգծել է նախագահը։
Նոյեմբերի 12-ից Աբխազիայում բողոքի ցույցեր են ընթանում՝ ընդդեմ Ռուսաստանի հետ ներդրումային համաձայնագրի վավերացման, ըստ որի՝ Ռուսաստանի Դաշնությունից ընկերությունները կկարողանան հանրապետության տարածքում իրենց նախագծերն իրականացնել մի շարք արտոնություններով։ Վավերացման հարցի քննարկումը պետք է տեղի ունենար նոյեմբերի 15-ին, սակայն երկրի խորհրդարանը այն հետաձգեց։ Խորհրդարանի շենքի մոտ նոր բողոքի ակցիա է սկսվել. դրա մասնակիցները պահանջում են պատգամավորներից ժողով անցկացնել և դեմ քվեարկել համաձայնագրի վավերացմանը։ Ավելի ուշ ընդդիմության առաջնորդ Թեմուր Գուլիան Սուխումում ցուցարարներին ասել է, որ Աբխազիայի իշխանությունները համաձայնել են հետ կանչել Ռուսաստանի Դաշնության հետ ներդրումային համաձայնագրի վավերացման մասին օրինագիծը։
