Միջազգային
«Նրա կոկորդիլոսի արցունքները ոչ մեկին չեն հետաքրքրում»․ Կոբախիձեն՝ Զուրաբիշվիլիին
Վրաստանի նախագահ Սալոմե Զուրաբիշվիլին հայտարարել է, որ երկրի ՆԳ նախարար Վախթանգ Գոմելաուրիի հետ կապ հաստատել չի լինում, նա չի պատասխանում իր հեռախոսազանգերին։
«Երկրի տարբեր վայրերում տեղի են ունենում դաժան գործողություններ, ջարդել են մեդիա տեխնիկան։ Հավաքվել են խմբեր, որոնց նպատակն իրավիճակի սրումն է։ Շատ տխուր է, որովհետև սա է մեր երկրի դեմքը, համբավը, թուլությունը։ Ես չեմ կարող կապ հաստատել ՆԳ նախարարի հետ, ցավոք, իմ վարչակազմը չի կարող կապ հաստատել նրա տեղակալի հետ, չի աշխատում պաշտոնական կառավարական գիծը։ Ուզում եմ Վախթանգ Գոմելաուրիին խնդրել, որպեսզի ոստիկանական բաժանմունքներում ոստիկանության արձագանքն ավելի ժամանակին և արդյունավետ լինի»,- ասել է Վրաստանի նախագահը։
Զուրաբիշվիլիին արձագանքել է Վրաստանի վարչապետ Իրակլի Կոբախիձեն՝ հայտարարելով, որ նրա կոկորդիլոսի արցունքները ոչ մեկին չեն հետաքրքրում։
«Զուրաբիշվիլին ոչ մի կապ չունի ՆԳՆ-ի ու ՆԳ նախարարի հետ։ Սա խորհրդարանական հանրապետություն է, որտեղ կա ուղղահայաց գիծ, կա կառավարություն, կա ենթակայության համակարգ, և նա պետք է հարգի այս համակարգը»,- ասել է Վրաստանի վարչապետը։
