Միջազգային
Իսրայելը հարվածել է Լիբանանի հյուսիսի գյուղերից մեկին․ կա 21 զոհ
Առնվազն 21 մարդ է զոհվել Լիբանանի հյուսիսում իսրայելական ավիահարվածի հետևանքով․ BBC-ի փոխանցմամբ հայտնել են երկրի իշխանությունները:
Հարվածը հասցվել է Այտու գյուղին, որտեղ հիմնականում քրիստոնյաներ են բնակվում։
Այս վայրը բավականին հեռու է Բեյրութից և այլ տարածքներից, որտեղ իսրայելական բանակը սովորաբար հարվածներ է հասցնում: Դեպքի վայրից ստացված տեղեկությունների համաձայն՝ հարվածի հետևանքով ամբողջությամբ ավերվել է բնակելի շենք։
Իսրայելը տեղի ունեցածը դեռ չի մեկնաբանել, սակայն երկուշաբթի երկրի վարչապետ Բենյամին Նեթանյահուն խոստացել է «շարունակել հարվածներ հասցնել «Հըբոլլահին» ողջ Լիբանանով»:
Նա այս հայտարարությունն արել է Իսրայելի հյուսիսում գտնվող ռազմաբազա կատարած այցի ժամանակ, որտեղ կիրակի օրը «Հըզբոլլահ»–ի անօդաչու թռչող սարքի հարձակման հետևանքով զոհվել է չորս իսրայելցի զինվոր, մի քանի տասնյակ վիրավորվել: Սա վերջին մեկ տարվա ընթացքում լիբանանյան խմբավորման կողմից Իսրայելի վրա իրականացված ամենամեծ հարձակումն էր:
Այտա գյուղի բնակիչները լրագրողներին ասել են, որ հարվածից առաջ ոչ մի նախազգուշացում չի եղել, միայն մեկ հզոր պայթյուն:
