Քալիֆորնիայում ԱՄՆ նախագահի թեկնածու Դոնալդ Թրամփի հանրահավաքից առաջ զինված տղամարդ է ձերբակալվել․ այս մասին BBC-ի փոխանցմամբ հայտնել է ոստիկանությունը:
Միջադեպը տեղի է ունեցել Կոաչելլա քաղաքում շաբաթ երեկոյան։
Լաս Վեգասի 49-ամյա բնակիչ Վեմ Միլլերին ձերբակալել են Թրամփի ելույթից մեկ ժամ առաջ՝ խաչմերուկում գտնվող անցակետերից մեկում. նա եղել է սև ամենագնացի ղեկին և իր մոտ ունեցել է որսորդական հրացան, լիցքավորված ատրճանակ և պահեստատուփ:
Իշխանությունները նաև պնդում են, որ տղամարդն իր հետ մի քանի անձնագիր և վարորդական իրավունք է ունեցել: Նշվում է, որ տղամարդը ձերբակալվել է ապօրինի զենք-զինամթերք պահելու մեղադրանքով, այնուհետև 5 հազար դոլար գրավի դիմաց ազատ է արձակվել:
Իշխանությունները հայտարարել են, որ միջադեպը չի ազդել Թրամփի կամ հանրահավաքի մասնակիցների անվտանգության վրա:
