ԱՊՀ երկրների ԱԳ նախարարները Մոսկվայում կայացած հանդիպմանը հայտարարություն են ընդունել եվրասիական տարածքում անվտանգության ոլորտում համագործակցության սկզբունքների մասին՝ նշելով միջազգային իրավունքի համակարգման պահպանման կարևորությունը. հայտնում է ԱՊՀ գործադիր կոմիտեն։
Փաստաթղթում նշվում է, որ ԱՊՀ երկրները գիտակցում են միջազգային իրավունքի պահպանման և պաշտպանության անհրաժեշտությունը, որի հիմքը ՄԱԿ-ի կանոնադրությունն է: Նշվում է միջազգային հարաբերություններում կանոնների և նորմերի պարտադրման անթույլատրելիությունը՝ առանց բոլոր շահագրգիռ պետությունների իրավահավասար մասնակցության, ինչպես նաև այն, որ ԱՊՀ-ն ձգտում է ամրապնդել իր դերն այդ գործընթացում։
Բացի այդ, հայտարարության մեջ կոչ է արվում համախմբել միջազգային հանրությանը՝ գլոբալ և տարածաշրջանային անվտանգության մարտահրավերների համար հավաքական լուծումներ գտնելու համար: Առաջարկվում է միջպետական հակասությունների պատճառները վերացնելու և կոնֆլիկտային ներուժը նվազեցնելու համար օգտագործել քաղաքական-դիվանագիտական միջոցներ։
Փաստաթղթում նաև ասվում է անվտանգության, տնտեսության և մշակույթի ոլորտներում փոխգործակցության ճարտարապետությունը բազմաբևեռ իրողություններին հարմարեցնելու անհրաժեշտության մասին: ԱՊՀ երկրները պատրաստակամություն են հայտնել նպաստել Եվրասիայում հավասար և անբաժանելի անվտանգության համակարգի ստեղծմանը, ինչպես նաև ռազմաքաղաքական իրադրության երկարաժամկետ կայունացմանը և տարածաշրջանային նոր հակամարտությունների կանխմանը:
ԱՊՀ ԱԳ նախարարները վճռականորեն դատապարտել են ուժի կիրառման ցանկացած փորձ, որն ուղղված է Եվրասիայում ինտեգրացիոն գործընթացների խափանմանը: Նախարարները կոչ են արել հավասարակշռել շահերն ու փոխզիջումները՝ հակամարտությունները կանխելու և տարածաշրջանում կայունությունը պահպանելու նպատակով:
ԱՊՀ ԱԳ նախարարների խորհրդի հաջորդ նիստը կանցկացվի 2025թ. Ղազախստանում։
