Միջազգային
Իրանի կառավարությունը քայլեր կձեռնարկի սիոնիստների վերջին ոճրագործության դեմ․ Փեզեշքիան
Իրանի նախագահ Մասուդ Փեզեշքիանը դատապարտել է Իսրայելի հարձակումները Բեյրութի վրա։ Ըստ Tasnim լրատվական գործակալության՝ նախագահը հայտարարել է, որ դատապարտում է ուրբաթ օրը Սիոնիստական ռեժիմի հարձակումները Բեյրութի Դահիյա թաղամասի վրա՝ համարելով բացահայտ և անթաքույց պատերազմական հանցագործություն։
«Սա բացահայտ և անթաքույց պատերազմական հանցագործություն է, որը ևս մեկ անգամ բացահայտեց ռեժիմի պետական ահաբեկչության բնույթը։ Պաղեստինի և Լիբանանի ժողովուրդների դեմ Սիոնիստական ռեժիմի հանցագործությունները ապացուցում են, որ այս ռեժիմը ամենամեծ սպառնալիքն է տարածաշրջանային և միջազգային խաղաղության ու անվտանգության համար:
Ակնկալում ենք, որ աշխարհի բոլոր երկրները, հատկապես՝ իսլամական երկրները, խստորեն կդատապարտեն այս հանցագործությունը։ Իմ ցավակցությունն եմ հայտնում Լիբանանի ժողովրդին և կառավարությանը, նահատակների ընտանիքներին։ Կիսում եմ ձեր վիշտը, լիբանանյան դիմադրության սիրելի ու հպարտ ժողովուրդ։ Իրանի Իսլամական Հանրապետության կառավարությունը քայլեր կձեռնարկի սիոնիստների վերջին ոճրագործության դեմ և միշտ կաջակցի Լիբանանի ժողովրդին ու դիմադրության առանցքին»,- ասել է Փեզեշքիանը։
