Միջազգային
«Անցած 16 տարիների ընթացքում Վրաստանը քաղաքականապես հասունացել է». Կարասինը՝ Իվանիշվիլիին
ՌԴ Դաշնային խորհրդի միջազգային հարցերի հանձնաժողովի նախագահ Գրիգորի Կարասինը մեկնաբանել է «Վրացական երազանք» կուսակցության պատվավոր նախագահ Բիձինա Իվանիշվիլիի հայտարարությունը՝ Հարավային Օսիայի ժողովրդից ներողություն խնդրելու հետ կապված:
«Հարավային Օսիայի հետ հարաբերություններում նոր մթնոլորտ ստեղծելու հնարավորության մասին Բիձինա Իվանիշվիլիի և վրացի այլ գործիչների հայտարարության անսպասելի տոնայնությունը Կովկասում և, ընդհանրապես, աշխարհում, մեծ հետաքրքրությամբ է ընդունվել։ Դրա պատճառները շատ են։ Հասունանում է այն ըմբռնումը, որ 2008 թվականին Սահակաշվիլիի արկածախնդրությունից հետո թշնամանքն ու առճակատումը պետք է տեղը զիջեն բանականությանը և կայունությանը։
Անցած 16 տարում Վրաստանը քաղաքականապես հասունացել է։ Շատերի համար հասկանալի դարձավ հավերժական դիմակայության անհեռանկարայնությունը։ Նախընտրական մթնոլորտում դա կանխատեսելիորեն առաջացրել է ֆոկուս խմբերի սկանդալային էմոցիաների պոռթկում, որոնց մտքով չի անցնում սեփական երկրում քաղաքական գործընթացների հանգիստ զարգացումը։ Վրաստանի խորհրդարանի առաջիկա ընտրությունների նախօրեին սրացումը ձեռնտու է նաև նրանց, որոնք Վրաստանում և տարածաշրջանում ապակայունացման մեջ տեսնում են իրենց ռազմավարական շահը», - նշել է Կարասինը։
Քաղաքական գործիչը ապավինել է Վրաստանի քաղաքացիների «պատասխանատու ընտրությանը»՝ նկատի ունենալով, ենթադրաբար, խորհրդարանական ընտրությունները:
Հիշեցնենք՝ Իվանիշվիլին հայտարարել էր, որ Սահակաշվիլիի կողմից 2008 թվականին հիմնադրված «Միացյալ ազգային շարժում» կուսակցության փոխարեն Վրաստանն ուժ կգտնի ներողություն խնդրել «օս եղբայրներին ու քույրերին կրակի բոցերի մեջ գցելու համար»։
