Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը Հադսոնի ինստիտուտում կայացած բանավեճի ժամանակ կրկին խոսել է ՀՀ սահմանադրության փոփոխությունից։
«Ինչ վերաբերում է այն դժվարություններին, որոնց բախվում է Փաշինյանը սահմանադրական փոփոխությունների հետ կապված, չպետք է մոռանանք, որ ամենաբարդ մասն արդեն լուծված է։ Փաշինյանը բացահայտ խոստովանել է, որ տարածքային պահանջներ չունի Ադրբեջանի նկատմամբ, նույնիսկ նշել է քառակուսի մետրերի եւ կիլոմետրերի քանակը, որոնք նա ճանաչում է որպես մեր երկրի մաս», - հայտարարել է Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը Հադսոնի ինստիտուտում կայացած բանավեճի ժամանակ:
«Փաշինյանն իր արտգործնախարարի միջոցով համաձայնել է հինգ հիմնարար սկզբունքների հետ, որոնք ընկած են խաղաղության համաձայնագրի նախագծի հիմքում։ Այս սկզբունքներից մեկը միմյանց տարածքային ամբողջականության և ինքնիշխանության փոխադարձ հարգումն է և ներկա կամ ապագա տարածքային պահանջներից հրաժարվելը: Նա կատարեց այդ ուղերձի ամենաբարդ մասը։ Այժմ ակնկալվում է, որ նա իր հռետորաբանությունն ու քաղաքական հայտարարությունները համապատասխանեցնելու է տեղում տիրող իրավիճակին։ Պարզապես ասել, որ «ինձ համար դժվար կլինի լուծել այս խնդիրը հայրենիքում ունեցած խնդիրների պատճառով», թույլ մխիթարություն է։ Ակնկալում ենք, որ նա հավատարիմ կմնա իր պաշտոնական դիրքորոշմանը որպես վարչապետ, որ Ղարաբաղը Ադրբեջանի միջազգայնորեն ճանաչված տարածքի մի մասն է, Հայաստանը դրա նկատմամբ ոչ մի հավակնություն չունի, եւ որ նրանք պատրաստ են կարգավորել հարաբերությունները Ադրբեջանի եւ նրա մյուս հարեւանների հետ այդ պարտավորության հիման վրա: Այն, ինչ անհրաժեշտ է, պարզապես փոփոխություն է, որի նպատակն է վերացնել այս մրցակցության հիմնական պատճառը: Պատկերացրեք, որ մենք գործում և ստորագրում ենք այն, իսկ հետո, որոշ ժամանակ անց, իշխանության է գալիս Հայաստանի նոր կառավարությունը և հայտարարում, որ նախորդ վարչապետի ստորագրած համաձայնագիրը լեգիտիմ չէ, հակասում է Սահմանադրության տառին և ոգուն և չունի բարձրագույն իրավաբանական ուժ ՀՀ Սահմանադրությանը համապատասխան: Սա նշանակում է, որ դուռը բաց ենք թողնելու ապագա ռևանշիստական տրամադրությունների և հռետորաբանության համար, որոնք, ինչպես տեսնում ենք, այսօր ավելի մեծ թափ են ստանում Հայաստանում: Ահա թե ինչու ես կարծում եմ, որ այդ հարցը չի կարելի անտեսել որեւէ մեկին, ով իսկապես խաղաղություն է ցանկանում», - նշել է Ամիրբեկովը։
