Միջազգային
Թրամփի վրա կրակողը հանգստյան օր է խնդրել՝ ասելով, որ «գործեր ունի»
ԱՄՆ նախկին նախագահ Դոնալդ Թրամփի դեմ մահափորձ կատարած հրաձիգը շաբաթ օրը պետք է աշխատավայրում լիներ, բայց նա հանգստյան օր է խնդրել՝ ասելով, որ «գործեր ունի», փոխանցում է CNN-ը։
Ըստ աղբյուրի՝ ժամը 15։00-ին՝ կրակոցներից մոտ երեք ժամ առաջ, Քրուքսը հավաքի անցկացման վայրում է գտնվել։ Երբ նա անցել է մագնիսաչափերի սարքի միջով, իր մոտ եղել է հեռադիտակ։ Դա չի խանգարել Քրուքսին անցնել անվտանգության զննման կետը, բայց գրավել է անվտանգության աշխատակիցների ուշադրությունը, ովքեր հետևել են նրան, մինչ լքել է տարածքը:
Քննիչները վստահ չեն, թե ուր է գնացել Քրուքսը, սակայն աշխատանքային տեսությունն այն է, որ մոտեցել է իր մեքենային՝ հրացանը վերցնելու նպատակով: Մոտավորապես նույն ժամանակահատվածում ականատեսներն ահազանգել են ոստիկանությանը՝ հայտնելով, որ ինչ-որ մեկը American Glass Research-ի շենքի տանիքում է։
Ժամը 23:00-ի սահմաններում Քրուքսի հայրը հայտնել է, որ որդին շաբաթ օրը վերցրել է հրացանը, որպեսզի գնա հրաձգարան, և կարծում է, որ նա կվերադառնա մոտավորապես ժամը 13:00-ին։
Հրաձգությունից հետո իրավապահ մարմինների բազմաթիվ աղբյուրներ հայտնել են, որ քննիչները Քրուքսի մեքենայում հայտնաբերել են զրահաբաճկոն, երեք լիցքավորված պահունակ և երկու հեռակառավարվող պայթուցիկ սարք:
Բացի այդ, նրա տունը խուզարկելուց հետո քննիչները գտել են ևս մեկ զրահաբաճկոն, մեկ այլ հեռակառավարվող պայթուցիկ սարք և 3D տպիչ: Վերջին մի քանի ամիսների ընթացքում Քրուքսը մի քանի փաթեթ է ստացել, դրանցից ոմանք պիտակավորված են եղել որպես պոտենցիալ վտանգավոր նյութեր:
