Ռուսաստանը պետք է վերսկսի ցամաքային միջին և փոքր հեռահարության հրթիռների արտադրությունը, հայտարարել է ՌԴ նախագահ Վլադիմիր Պուտինը Անվտանգության խորհրդի մշտական անդամների հետ հանդիպման ժամանակ։
Միաժամանակ նա վկայակոչել է 5 տարի առաջ Միջին հեռահարության միջուկային ուժերի պայմանագրից դուրս գալու ԱՄՆ որոշումը։
«Միացյալ Նահանգները հեռու պատրվակով դուրս եկավ այս պայմանագրից և հայտարարեց, որ արտադրելու է նման հրթիռային համակարգեր», - ասել է Պուտինը։
Նրա խոսքով՝ ամերիկյան միջին և փոքր հեռահարության հրթիռները «վարժությունների համար» տեղափոխվել են Եվրոպա, իսկ վերջերս «հայտարարվել է, որ դրանք գտնվում են Ֆիլիպիններում»։
«Մենք պետք է արձագանքենք դրան և որոշում կայացնենք, թե ինչ պետք է անենք այս ոլորտում: Ըստ երևույթին, մենք պետք է սկսենք արտադրել այդ հարվածային համակարգերը, իսկ հետո, ելնելով փաստացի իրավիճակից, որոշում կայացնենք, թե որտեղ, անհրաժեշտության դեպքում, ապահովելու համար մեր անվտանգությունը, տեղադրենք դրանք»,- ասել է Պուտինը։
