Թուրքիան ցանկանում է հայց ներկայացնել ընդդեմ Նեթանյահուի՝ ցեղասպանության մեղադրանքով
Միջազգային
14 Նոյեմբերի, 20:49
Անկարան ցանկանում է Միջազգային քրեական դատարանում հայց ներկայացնել Իսրայելի վարչապետ Բենիամին Նեթանյահուի դեմ՝ նրան մեղադրելով Գազայի հատվածում ցեղասպանության մեջ։ Այս մասին X սոցիալական ցանցում հայտնել է Թուրքիայի իշխող Արդարություն և զարգացում կուսակցության փաստաբան Մեթին Քուլունքը։
«Այսօր, ներկայացնելով Թուրքիայի Հանրապետության քաղաքացիների խիղճը, մենք դիմում ենք ուղարկել մեր Արդարադատության նախարարություն` հայց ներկայացնելու Հաագայի Միջազգային քրեական դատարան՝ ընդդեմ 21-րդ դարի Հիտլերի՝ Իսրայելի վարչապետ Նեթանյահուի, ով պետք է դատարանի առաջ կանգնի Գազայի հատվածում իրականացրած ցեղասպանության և մարդկության դեմ ուղղված բոլոր հանցագործությունների համար»,- գրել է փաստաբանը։
Փաստաբանը հրապարակել է հայցի առաջին էջը և պարզաբանել, որ այն երկու գործընկերների հետ ներկայացրել է Թուրքիայի արդարադատության նախարարության հաստատմանը, որն էլ 23 էջանոց փաստաթուղթը պետք է ուղարկի ՄՔԴ։
