Միջազգային
Վրաստանից հերքում են՝ Նովոռոսիյսկ-Բաթումի-Նովոռոսիյսկ ծովային երթուղով փոխադրումները կանոնավոր չեն եղել
Վրաստանի ծովային տրանսպորտի գործակալությունը հերքել է հայկական ԶԼՄ-ների հրապարակումներն այն մասին, թե Նովոռոսիյսկ-Բաթումի-Նովոռոսիյսկ ծովային երթուղով կանոնավոր փոխադրումներ են սկսել:
Միևնույն ժամանակ՝ գործակալությունը հաստատում է, որ ապրիլին իսկապես երկու փոխադրում է իրականացվել, բայց դրանք կանոնավոր չեն եղել, և դրանք իրականացվել են Պալաուի դրոշի տակ գտնվող Haci Musa Ucak նավի կողմից (IMO 9128544):
Ընկերությունը, որին պատկանում է նշված նավը, ներառված չէ պատժամիջոցների ցուցակում և նախատեսում է հետագայում նաև կոմերցիոն փոխադրումներ իրականացնել, ընդգծում Է գործակալությունը: Ինչ վերաբերում է բեռին, ապա այն իսկապես նախատեսված է եղել Հայաստանի Հանրապետության համար։
«Վրաստանի ծովային տրանսպորտի գործակալությունը, համագործակցելով ֆինանսների նախարարության եկամուտների ծառայության հետ, մշտապես ստուգում է ինչպես նավերին, այնպես էլ նավատերերին միջազգային պատժամիջոցների հարցում։ Ըստ այդմ, եթե նավը կամ նավի սեփականատերը գտնվում են պատժամիջոցների ցանկում, նրանց չի թույլատրվում մուտք գործել Վրաստանի նավահանգիստներ և համապատասխան ընթացակարգեր իրականացնել», - նշվում է հայտարարության մեջ։
