Միջազգային
Ռուսաստանում էլեկտրոնային զինվորական ծանուցագիր կստեղծվի․ ի՞նչ է դա նշանակում
Ապրիլի 11-ին Ռուսաստանի պետական դուման փոփոխություններ է կատարել «Զինվորական հերթապահության և զինվորական ծառայության մասին» օրենքում, որոնք թույլ են տալիս ծանուցագրերը ներկայացնել ոչ միայն թղթային, այլև էլեկտրոնային եղանակով: Այս դեպքում էլեկտրոնային ծանուցագիրը կհամարվի մատուցված այն պահից, երբ այն կտեղադրվի հանրային ծառայությունների ռուսական հարթակի քաղաքացու անձնական հաշվում: Թղթային ծանուցագրերը չեն չեղարկվի, սակայն այժմ դրանք կարող են ուղարկվել նաև պատվիրված փոստով։ Նման ծանուցագիրը կհամարվի տրված, եթե անգամ քաղաքացին հրաժարվի այն ստանալուց։
Պետդումայի ընդունած փոփոխությունները մի շարք սահմանափակումներ են նախատեսում նաև նրանց համար, որոնք փորձում են խուսափել զինկոմիսարիատի ծանուցագրերից։ Մասնավորապես, ծանուցագիր ստացած զինապարտներին այն ստանալու օրվանից արգելվում է լքել Ռուսաստանը։ Կոմիսարիատ գալու համար 20 օր ժամանակ է սահմանվում։ Նշված ժամկետից հետո ժամկետային զինծառայողին կարգելվի վարկեր և փոխառություններ ստանալ, ինչպես նաև հաշվառվել որպես անհատ ձեռնարկատեր, գրանցել անշարժ գույք և ավտոմեքենա։ Նա կկորցնի նաև տրանսպորտային միջոցներ վարելու իրավունքը։
