Ադրբեջանի ՊՆ-ն հաղորդագրություն է տարածել՝ հերքելով հայ զինծառայողի գերեվարման մասին լուրը։
«Հայաստանի պաշտպանության նախարարության տարածած տեղեկությունը, թե մարտի 21-ին Հայաստանի զինված ուժերի զինծառայողը մեքենայով մոտեցել է ադրբեջանական բանակի ստորաբաժանումների դիրքերին և գերի է ընկել, իրականությանը չի համապատասխանում»,- ասվում է Ադրբեջանի ՊՆ հաղորդագրության մեջ։
Ավելի վաղ հայտնել էինք, որ մարտի 21-ին՝ ժամը 12:20-ի սահմաններում, ՀՀ ԶՈւ զինծառայող Մ. Գ.-ն, մարտական հենակետ մեքենայով սնունդ տեղափոխելիս, վատ տեսանելիության և մառախուղի պայմաններում նախնական տվյալներով մոլորվել է տեղանքում ու մեքենայով հայտնվել ադրբեջանական վերահսկողության տակ գտնվող տարածքում։
