ՌԴ ԱԳՆ պաշտոնական ներկայացուցիչ Մարիա Զախարովայի փոխանցմամբ՝ մարտի 20-ին ՌԴ ԱԳ նախարար Սերգեյ Լավրովը Մոսկվայում կհանդիպի Հայաստանի արտգործնախարար Արարատ Միրզոյանի հետ:
«Մարտի 20-ին ՌԴ ԱԳՆ ղեկավարը բանակցություններ կվարի Հայաստանի ԱԳ նախարարի հետ, ով աշխատանքային այցով կժամանի Մոսկվա»,- ճեպազրույցում ասել է Զախարովան։
Ըստ Զախարովայի՝ բանակցություններում նախարարները կքննարկեն «երկկողմ համագործակցության հետագա զարգացմանն ուղղված քայլերը, ընդհանուր ինտեգրացիոն ասոցիացիաներում՝ ԱՊՀ, ԵԱՏՄ, ՀԱՊԿ, համագործակցության ամրապնդման հարցերը»։
«Քննարկումը կկենտրոնանա տարածաշրջանային խնդիրների վրա, այդ թվում՝ Լաչինի միջանցքի շուրջ ստեղծված իրավիճակի կարգավորման և, ընդհանրապես, Լեռնային Ղարաբաղի հարցում Ռուսաստանի, Հայաստանի և Ադրբեջանի եռակողմ պայմանավորվածությունների կատարման: Մենք ակնկալում ենք, որ առաջիկա հանդիպումը կնպաստի Երևանի հետ երկխոսության որակի բարձրացմանը, ինչպես նաև Հարավային Կովկասում անվտանգության ու կայունության ամրապնդմանն ուղղված աշխատանքներին»,- հավելել է Զախարովան։
