Արևմտյան երկրները չեն ծրագրել հարձակվել Ռուսաստանի վրա, չեն ձգտում նրա նկատմամբ վերահսկողություն հաստատել կամ ոչնչացնել։ Այս մասին երեքշաբթի օրը հայտարարել է ԱՄՆ նախագահ Ջո Բայդենը՝ ելույթ ունենալով Վարշավայում։
«Ես ևս մեկ անգամ դիմում եմ ռուս ժողովրդին. ԱՄՆ-ն և եվրոպական երկրները չեն ձգտում Ռուսաստանի նկատմամբ վերահսկողություն հաստատել կամ ոչնչացնել այն: Արևմուտքը չի պլանավորել հարձակվել Ռուսաստանի վրա։ ՌԴ միլիոնավոր քաղաքացիները, ովքեր ցանկանում են միայն խաղաղ ապրել իրենց հարևանների հետ, մեր թշնամիները չեն»,- ասել է ԱՄՆ նախագահը։
Նա ողբերգություն է անվանել Ուկրաինայի ներկայիս իրավիճակը։ Բայդենի խոսքով՝ Ռուսաստանը կարող է վերջ դնել Ուկրաինայի հակամարտությանը։ Միևնույն ժամանակ, ինչպես նշել է Բայդենը, եթե Ուկրաինան դադարի պաշտպանվել Ռուսաստանի Դաշնության դեմ, դա կլինի Ուկրաինայի ավարտը։ «Այդ պատճառով մենք միասին ապահովում ենք, որ Ուկրաինան կարողանա պաշտպանել իրեն»,- հավելել է Սպիտակ տան ղեկավարը։
Բայդենը նաև նշել է․ «Պուտինը կարծում էր, որ կարող է էներգիան օգտագործել որպես զենք, բայց ոչ։ Մենք մոբիլիզացրինք և նվազեցրինք մեր կախվածությունը ռուսական էներգետիկ ռեսուրսներից»։
Բայդենն ընդգծել է, որ ԱՄՆ-ն աշխարհում մեծ կոալիցիա է կազմել Ուկրաինային օգնելու համար` շուրջ 50 պետություն․ «Եթե Ռուսաստանը հարձակվի գեթ մեկ ՆԱՏՕ-ի անդամ երկրի վրա, դա կլինի հարձակում ողջ դաշինքի նկատմամբ»։
ԱՄՆ նախագահը նաև հավելել է, որ այս շաբաթ Միացյալ Նահանգները կհայտարարի ՌԴ դեմ նոր պատժամիջոցների մասին։
