Մանրամասներ՝ Թուրքիայում տեղի ունեցած նոր երկրաշարժերից․ կան տուժածներ
Միջազգային
20 Փետրվարի, 23:12
ՀՀ ԱԻՆ-ը տեղեկացնում է, որ փետրվարի 20-ին ՀՀ ԱԻՆ Սեյսմիկ պաշտպանության տարածքային ծառայության սեյսմոլոգիական ցանցի կողմից գրանցվել է հյուսիսային լայնության 36.13⁰ և արևելյան երկայնության 36.04⁰ աշխարհագրական կոորդինատներով Թուրքիա՝ Հաթայ քաղաքից 13 կմ հարավ-արևմուտք, օջախի 10 կմ խորությամբ, 6․4 մագնիտուդով երկրաշարժ: Էպիկենտրոնային գոտում ստորգետնյա ցնցման ուժգնությունը կազմել է 8-9 բալ:
Թուրքական լրատվամիջոցները հայտնում են, որ փլատակներում կան մարդիկ։ Թուրքիայի փոխնախագահ Ֆուաթ Օքթայն էլ հայտնել է, որ առնվազն ութ մարդ վիրավորվել է։ Նա կոչ է արել բնակիչներին հեռու մնալ վնասված շենքերից և ծովի առափնյա շրջանից, քանի որ ծովի մակերեսը կարող է բարձրանալ 50 սանտիմետրով:
Նշվում է նաև, որ Հաթայ նահանգի Սամանդաղ քաղաքում երկրաշարժից հետո կին է մահացել, չորս մարդ մնացել է փլատակների տակ։
Անադոլուն հայտնում է, որ երկրաշարժը զգացվել է հարևան նահանգներում, ինչպես նաև Սիրիայում, Լիբանանում, Հորդանանում, Իրաքում, Պաղեստինում, Իսրայելում և Լիբանանում։ SANA-ն հայտնում է, որ Սիրիայում ևս կան փլուզումներ, տուժել է 6 մարդ։
