Քաղաքական մեկնաբան Հակոբ Բադալյանը գրել է.
«Նիկոլ Փաշինյանը լրագրողների հետ զրույցում անդրադարձել է ԱՄՆ նախկին պետքարտուղար Ջեյմս Օ Բրայանի հոդվածին:
Փաշինյանի արձագանքը հնարավոր է գնահատել նույնիսկ սենսացիոն: Ինչպես հայտնի է, Օ Բրայանը հոդվածում գրել էր, որ օգոստոսի 8-ին տեղի ունեցածի հանրագումարում Հայաստանը խոցելի վիճակում է:
Եվ ահա, Նիկոլ Փաշինյանը այսօր հայտարարել է, որ Հայաստանը ավելի խոցելի վիճակում էր այն ժամանակ, երբ հարցով զբաղվում էր դեմոկրատական վարչակազմը, և Օ՛Բրայանը այդ վարչակազմի պետքարտուղարի տեղակալ էր:
Սա սենսացիոն արձագանք է: Եթե համարենք, որ նա ընդամենը փորձում է դուր գալ Թրամպին՝ քննադատելով դեմոկրատներին, ինչպես անում է Իլհամ Ալիևը, դա էլ տարբերակ է, բայց Նիկոլ Փաշինյանը, կարծես, մի քիչ ավելի է ծավալվում՝ պարզապես Թրամպին դուր գալու համար:
Հետևաբար, տողատակում կա նաև այլ շերտ: Կարևոր է դիտարկել նրա հայտարարությունը, որ «Օ՛Բրայանը խնդիր ունի՝ բացատրելու այն, որ ինչ չկարողացան իրենք, կարողացավ Թրամպը»:
Փորձենք դիտարկել՝ իսկ ի՞նչն էր Թրամպի ու նախորդ վարչակազմի ֆունդամենտալ տարբերությունը, այդ թվում՝ նաև կովկասյան իրողությունների վրա տարածվող:
Ֆունդամենտալ տարբերությունն այն է, որ Թրամպը գործում է Ռուսաստանի հետ գործարքի գնալու, երկխոսության, պայմանավորվածության տրամաբանությամբ, իսկ նախորդ վարչակազմը Կովկասը դիտարկում էր Ռուսաստանի և Իրանի դեմ պլացդարմ և բաց տեքստով հայտարարում այդ մասին:
Հետևաբար, այդ ֆունդամենտալ տարբերությունից էլ պետք է բխեր արդյունքի տարբերությունը: Ըստ իս, սա է Նիկոլ Փաշինյանի խոսքի տողատակում առանցքայինը, որ Թրամպի մոտ ինչ-որ բան է ստացվել, որովհետև նա այդ բանին փորձել է հասնել Ռուսաստանի հետ գործարքով, ոչ թե՝ այն Ռուսաստանի դեմ օգտագործելու համար»:
