Միջազգային
Գերմանիայում առգրավել են Ալիշեր Ուսմանովի 600 մլն դոլարանոց զբոսանավը
Գերմանիայի իշխանությունները ձերբակալել են ռուս միլիարդատեր Ալիշեր Ուսմանովի զբոսանավը։ Ուսմանովը ԵՄ պատժամիջոցների ցուցակում էր՝ կապված Ուկրաինայի դեմ ռուսական ագրեսիայի հետ։ Այս մասին չորեքշաբթի՝ մարտի 2-ին, հայտնել է Forbes-ը՝ հղում անելով զբոսանավերի բիզնեսով զբաղվող աղբյուրներին։
Ռուս օլիգարխի զբոսանավը վերանորոգման փուլում էր գտնվում Համբուրգի Blohm + Voss նավաշինարանում՝ 2021թ. հոկտեմբերից։ Ըստ ամերիկյան հրատարակության՝ մասնագետները, որոնք զբաղվում են նավի վերանորոգմամբ, չորեքշաբթի աշխատանքի չեն եկել, ինչը, հավանաբար, պայմանավորված է Ուսմանովի ունեցվածքը կալանքի տակ դնելու՝ Գերմանիայի իշխանությունների որոշմամբ։ Բացի զբոսանավից՝ Ուսմանովը առանձնատներ ունի Լոնդոնում, Մյունխենում և Մոնակոյում։
Ուսմանովի 156 մետրանոց «Դիլբար» զբոսանավի արժեքը գնահատվում է 600 մլն դոլար։ Այն օլիգարխի համար սարքել է գերմանական Lürssen նավաշինական ընկերությունը՝ 2016թ.։ Ինչպես նշում է թերթը, սա աշխարհի ամենամեծ մոտորային զբոսանավն է, որի անձնակազմը բաղկացած է 96 հոգուց։ Այն հագեցած է այդ դասի նավերի համար ամենամեծ լողավազանով, երկու ուղղաթիռներով, սաունայով, գեղեցկության սրահով և մարզասրահով։
Բացի զբոսանավից՝ Ուսմանովն ունի մի շարք անշարժ գույք Եվրոպայում, այդ թվում՝ առանձնատներ Լոնդոնում և Սուրեյում՝ 280 մլն դոլար ընդհանուր արժեքով, ինչպես նաև՝ դղյակներ Մյունխենում, Լոզանում, Մոնակոյում և Սարդինիայում։
VesselsValue վերլուծական կենտրոնի տվյալներով՝ բացի Ուսմանովից, 32 այլ ռուս միլիարդատերեր ևս ունեն Dilbar-ի կարգի սուպերզբոսանավեր։
