Չնայած Արեգակի արտաքուստ հանդարտ վիճակին՝ վերջին օրերին գիտնականները շարունակում են արձանագրել պլազմանյութի հսկայական ժայթքումներ ուղիղ տիեզերք։ Վերջին դեպքը տեղի է ունեցել այսօր՝ միաժամանակ Արեգակի ձախ և աջ եզրերից։ Ըստ մասնագետների՝ հատկապես տպավորիչ էր աջ կողմի պրոտուբերանցը, որն իր վերջնական փուլում համարյա գերազանցել է Արեգակի չափերը, որից էլ առանձնացել էր։
Նշվում է, որ այս նույն պրոտուբերանցը գրեթե մեկ շաբաթ դիտարկվում էր հենց Արեգակի այն հատվածում, որն ուղղված է դեպի Երկիր։ Եթե այդ ժայթքումը տեղի ունենար այդ պահին, հնարավոր էր՝ Երկիրն ունենար լուրջ գեոմագնիսական և ճառագայթային ազդեցություններ։ Բարեբախտաբար, այժմ նման վտանգ չկա, քանի որ պլազմայի ուղղությունն ակնհայտորեն հեռու է Երկրից։
Տվյալ պլազմային արտազատման ուղղությամբ այժմ գտնվում է Վեներա մոլորակը, և, ըստ կանխատեսումների, պլազմայի հարվածը Վեներային կհասնի վաղը։ Մյուս՝ ձախ պրոտուբերանցը շարժվում է Մարսի ուղղությամբ, որը կհասնի նրա ուղեծրին մոտավորապես հուլիսի 6-ին։
Գիտնականները նշում են, որ նման խոշոր պրոտուբերանցների ակտիվացումը, ամենայն հավանականությամբ, կապված է Արեգակի բռնկիչ ակտիվության կտրուկ նվազման հետ։
Մասնագետները, միաժամանակ, զգուշացնում են. Արեգակի այն հատվածում, որը ներկայումս ուղղված է դեպի Երկիր, նոր պրոտուբերանցներ են ձևավորվում, և դեռ վաղ է լիովին հանգստանալ։ Միայն կարելի է հուսալ, որ դրանց ուղիները նույնպես կշեղվեն Երկրից՝ ուղևորվելով դեպի այլ մոլորակներ։
