Երկու եվրոպական արբանյակ հաջողությամբ ստացել են արևի արհեստական խավարումներ։ Դրանք ներդաշնակ թռիչքի միջոցով գիտական դիտարկումների համար ապահովել են ժամեր տևող լիակատար «խավար». գրում է AP-ը։
Եվրոպական տիեզերական գործակալությունը Փարիզի օդանավային ցուցահանդեսի ժամանակ հրապարակել է նորարարական այս առաքելության արդյունքները։ Արբանյակային այս դուետը տիեզերք է արձակվել անցյալ տարեվերջին և մարտից տասնյակ արհեստական արևի խավարումներ ստեղծել՝ Երկրից տասնյակ հազարավոր մղոն բարձրության վրա։
Արբանյակները թռչում են միմյանցից ընդամենը 150 մ հեռավորության վրա։ Դրանցից մեկը ծածկում է արևը, ինչպես լուսինն է անում բնական արևի խավարումների ժամանակ, իսկ մյուսը՝ հզոր հեռադիտակով նկարահանում արևի մթնոլորտային բարձր շերտը՝ կորոնան։ Սա հնարավոր է դարձել միլիմետրի ճշգրտությամբ նավիգացիայի և կառավարման շնորհիվ՝ օգտագործելով GPS, աստղադիտակներ, լազերներ ու ռադիոհաղորդիչներ։
Առաքելության երկու տարվա ընթացքում ակնկալվում է շաբաթական միջինը երկու արհեստական արևի խավարում՝ ընդհանուր մոտ 200, ինչը կապահովի ավելի քան 1000 ժամ շարունակական դիտարկում։ Սա իսկական գիտական հայտնագործություն կլինի, քանի որ արևի ամբողջական խավարումը տևում է ընդամենը մի քանի րոպե, երբ Լուսինը հիանալի կերպով գտնվում է երկրի և արևի միջև՝ միջինը ընդամենը 18 ամիսը մեկ անգամ:
Պատրաստեց՝ Ալվարդ Բաղդասարյանը
