Տեխնէ
Արհեստական բանականությամբ աշխատող հավելված, որ ձեզ երաժշտական աստղ կդարձնի
Եթե երբևէ երազել եք գումար վաստակել երաժշտություն գրելով, բայց մտածել եք, որ բավարար տաղանդ չունեք, այժմ ոչինչ չի խանգարում՝ փորձել դա անել: Բանն այն է, որ հիմա արդեն կա մի կայք ու նաև հավելված, որը կոչվում է «Boomy», որի օգնությամբ օգտատերերը կարողանում են ստեղծել իրենց երգերը՝ օգտագործելով արհեստական բանականության ծրագրային ապահովումը, որը կատարում է ողջ ծանր աշխատանքը:
Ընտրում եք երաժշտական ժանրերից որևէ մեկը, սեղմում «ստեղծել երգ» կոճակը, և արհեստական բանականությունը երգ է հորինում ձեզ համար՝ 30 վայրկյանից էլ քիչ ժամանակում: Այն արագ ընտրում է ստեղծագործության նոտաները, ակորդները և մեղեդին: Այնուհետ ինքներդ կարող եք ավարտուն տեսք հաղորդել այդ երաժշտությանը:
Կարող եք կատարել տարբեր գործողություններ՝ ավելացնել կամ հանել երաժշտական գործիքներ, փոխել տեմպը, հարմարեցնել երաժշտության բարձրությունը և ավելացնել արձագանքներ, դարձնել ավելի ուժգին կամ նուրբ հնչող, ավելացնել երգեցողական կտորներ:
Ուրախալին այն է, որ այս հավելվածի հիմնական փաթեթից կարող եք օգտվել անվճար: Ուշագրավ է, որ արհեստական բանականության օգտագործումը՝ երաժշտություն ստեղծելու համար, այդքան էլ նոր երևույթ չէ: Այսպես, 1980-ականներին դասական երաժշտության ամերիկացի երգահան Դեվիդ Քոփը մշակել էր այդպիսի մի ծրագիր:
Մի օր, երբ նա կարգավորումներում հրահանգել է ծրագրին՝ գրել այնպիսի երաժշտություն, որ նման լինի Յոհան Բախի ստեղծագործություններին, համակարգիչը ստեղծել է Բախի ստեղծագործություններից ոգեշնչված 5.000 երգչախմբային կատարում: Դրանք հետագայում թողարկվել են մեկ ալբոմով, որը կոչվում է «Մտահղացած Բախը» (Bach by Design):
