Հայաստանի հրաձգության հավաքականն ընդլայնված կազմով մասնակցում է Ֆրանսիայի Շատորու քաղաքում անցկացվող վազող թիրախ մրցաձևի Եվրոպայի առաջնությանը:
Վազող թիրախ խառը վազք մրցաձևում տղամարդկանց պայքարն ավարտվել է մեր թիմի հաջողությամբ։ Գոռ Խաչատրյանը 385 միավորով դարձել է Եվրոպայի չեմպիոն, իսկ Հայկ Մինասյանը 383 միավորով գրավել է երկրորդ հորիզոնականը։ Տղաները՝ Հովհաննես Մարգարյանի հետ միասին, թիմային հաշվարկում ևս արժանացել են թիմային ոսկե մեդալին։
Մեծահասակների վազող թիրախ նորմալ վազք մրցաձևի անհատական պայքարում Հայաստանի հավաքականի անդամ Արուսյակ Գրիգորյանը դարձել է Եվրոպայի առաջնության բրոնզե մեդալակիր։ Որակավորման փուլում Գրիգորյանը խոցել է 559 միավոր և հայտնվել լավագույն քառյակում։ Բրոնզե մեդալի համար պայքարում նա 8:6 հաշվով առավելության է հասել ուկրաինացի մարզուհու նկատմամբ:
Մեծահասակների վազող թիրախ խառը վազք մրցաձևի թիմային պայքարում Գոհար Հարությունյան / Լիլիթ Մկրտչյան / Արուսյակ Գրիգորյան եռյակը 1103 միավոր արդյունքով դարձել է Եվրոպայի առաջնության հաղթող։
Մեծահասակների վազող թիրախ նորմալ վազք մրցաձևի թիմային պայքարում Գոռ Խաչատրյան / Հովհաննես Մարգարյան / Հայկ Մինասյան եռյակը 1696 միավոր արդյունքով դարձել է Եվրոպայի առաջնության հաղթող։ Գոհար Հարությունյան / Լիլիթ Մկրտչյան / Արուսյակ Գրիգորյան եռյակը 1656 միավոր արդյունքով դարձել է Եվրոպայի առաջնության արծաթե մեդալակիր։
Վազող թիրախ միքս մրցաձևում Հովհաննես Մարգարյան / Արուսյակ Գրիգորյան զույգը դարձել է Եվրոպայի առաջնության բրոնզե մեդալակիր։ Որակավորման փուլում Մարգարյանն ու Գրիգորյանը 381 միավորով անցել են կիսաեզրափակիչ։ Լավագույն քառյակի պայքարում նրանք նախ 4:6 հաշվով զիջել են ուկրաինացի մարզիկներին, ապա 8:6 հաշվով առավելության են հասել բրոնզե մեդալի համար պայքարում և կանգնել են պատվո հարթակի երրորդ աստիճանին։
Հայաստանի մյուս ներկայացուցիչ Աիդա Ազատյանը ոսկե մեդալ է նվաճել վազող թիրախ նորմալ վազք մրցաձևի երիտասարդների անհատական պայքարում, իսկ Լիլիթ Մկրտչյանը դարձել է արծաթե մեդալակիր։ Որակավորման փուլում Ազատյանը խոցել է 533, իսկ Մկրտչյանը՝ 528 միավոր, և համապատասխանաբար 3-րդ և 4-րդ տեղերով անցել են կիսաեզրափակիչ փուլ։ Կիսաեզրափակչում մեր մարզուհիները հաղթել են մրցակիցներին և դուրս եկել եզրափակիչ։ Ոսկե մեդալի համար պայքարում հայ հրաձիգներից դիպուկ է գտնվել Ազատյանը, որը 7:5 հաշվով հաղթանակ է տարել:
Վազող թիրախ խառը վազք մրցաձևի երիտասարդների անհատական պայքարում Աիդա Ազատյանը 369 միավոր արդյունքով դարձել է Եվրոպայի առաջնության արծաթե մեդալակիր։
Վազող թիրախ մրցաձևի Եվրոպայի առաջնությունը կտևի մինչև օգոստոսի 7-ը: Հայաստանի հավաքականը մրցավայր է մեկնել մարզիչներ Էդգար Բաղդասարյանի և Էդվարդ Ղարիբյանի գլխավորությամբ։
