Ֆրանսիական ֆուտբոլի ղեկավարությունը լուրջ փոփոխություն է դիտարկում՝ սահմանափակելու ՊՍԺ-ի տարիներ շարունակվող գերիշխումը Լիգա 1-ում, հայտնում է L'Equipe-ը։
Փարիզյան ակումբը վերջին 13 մրցաշրջաններից 11-ում նվաճել է չեմպիոնի տիտղոսը և ներկայումս 19 միավորով առաջ է երկրորդ տեղում գտնվող Մարսելից՝ մեկ տուր առաջ։ Օսման Դեմբելեի և այլ աստղերի շնորհիվ Լուիս Էնրիկեի գլխավորած ՊՍԺ-ն շարունակում է տպավորիչ ելույթները և այս ամիս պատրաստվում է պատմական կերպով նվաճել իր առաջին Չեմպիոնների լիգայի գավաթը՝ եզրափակչում խաղալով Ինտերի դեմ։
Սակայն Ֆրանսիայի ֆուտբոլային ղեկավարները ցանկանում են նոր լիցք հաղորդել առաջնությանը։ Ըստ առաջարկվող փոփոխության՝ չեմպիոնի հարցը կլուծվի փլեյ-օֆ փուլով, ոչ թե առաջնության վերջնական աղյուսակի հիման վրա։
Ըստ նախագծի՝ կանցկացվեն կիսաեզրափակիչներ՝ 1-ին տեղը զբաղեցրած թիմը կմրցի 4-րդի հետ, իսկ 2-րդը՝ 3-րդի։ Հաղթողները կբախվեն եզրափակչում, որտեղ էլ կորոշվի Լիգա 1-ի չեմպիոնը։
Այս մոտեցումը կարող է հնարավորություն տալ Մարսելին, Մոնակոյին, Լիոնին և այլ թիմերին՝ կրկին պայքարելու Ֆրանսիայի գլխավոր տիտղոսի համար։ Այս որոշման արդյունքում նույնպես կարող են ակտիվանալ Նիսը, Ստրասբուրգը և 2021-ի չեմպիոն Լիլը։
Բացի այդ, քննարկվում է Ֆրանսիական ֆուտբոլի պրոֆեսիոնալ լիգայի (LFP) կառավարման մարմնի փոփոխությունը՝ անգլիական Պրեմիեր լիգայի օրինակով։ Հնարավոր է նաև վերականգնել Լիգայի Գավաթը, որը վերջին անգամ անցկացվել է 2020 թվականին։
