«Ֆեներբախչեի» գլխավոր մարզիչ Ժոզե Մոուրինյոն Թուրքիայի գավաթի խաղարկությունում «Գալաթասարայից» կրած պարտությունից հետո կրկին հայտնվել է սկանդալի կենտրոնում։
Թուրքիայի գավաթի խաղարկության քառորդ եզրափակչի խաղում «Ֆեներբախչեն» 1:2 հաշվով պարտվել է «Գալաթասարային»՝ դուրս մնալով մրցաշարից: Մոուրինյուի և «Գալաթասարայի» գլխավոր մարզիչ Օքան Բուրուկի միջև եզրափակիչ սուլիչից հետո միջադեպ է տեղի ունեցել. պորտուգալացի մասնագետը բռնել է Բուրուկի քթից, ինչից հետո վերջինս ընկել է խոտածածկին։
Մինչ միջադեպը ավելացված ժամանակում զանգվածային ծեծկռտուք էր սկսվել երկու թիմերի խաղացողների և անձնակազմի մասնակցությամբ, որին միջամտել են ոստիկանները: Արդյունքում խաղադաշտից հեռացվել են երկու թիմերի չորս խաղացողներ։
«Գալաթասարայի» փոխնախագահ Մեթին Օզթյուրքը դատապարտել է Մոուրինյոյի պահվածքը՝ «Ֆեներբախչեի» ղեկավարությանը կոչ անելով միջոցներ ձեռնարկել նախքան Թուրքիայի ֆուտբոլի ֆեդերացիայի միջամտությունը:
Սա առաջին անգամը չէ, երբ Մոուրինյոն հայտնվում է սկանդալի կենտրոնում։ Փետրվարին նա մեղադրվեց «Գալաթասարայի» կողմից ռասիզմի մեջ և չորս խաղով որակազրկվեց մրցավարներին վիրավորելու և թուրքական ֆուտբոլը քննադատելու համար:
