Կարլո Անչելոտին դատարանում ցուցմունք է տվել հարկային խարդախության գործով:
Ավելի վաղ Մադրիդի դատախազությունը 4 տարի 9 ամիս ազատազրկում էր պահանջել «Ռեալի» գլխավոր մարզչի համար՝ խարդախության մեղադրանքով:
Իտալացու ընդհանուր հարկային պարտքը կազմել է 1 մլն 217,9 հզ եվրո։ Բացի այդ, նրան տուգանել են 243,6 հզ եվրոյի չափով։ Անչելոտին մեղադրվում է 2014-15թթ․ երկու իրավախախտման մեջ: Նրա նկատմամբ պահանջում են երկու տուգանք սահմանել՝ 3 մլն 186,2 հզ եվրո ընդհանուր գումարով։
Դատախազը կարծում է, որ, չնայած Իսպանիայի հարկային ռեզիդենտի իր կարգավիճակի հաստատմանը, Անչելոտին հարկային հայտարարագրերում նշել է միայն «Ռեալից» ստացած աշխատանքի վարձատրությունը և չի ներկայացրել իմիջային իրավունքների օգտագործման եկամուտները:
«Երբ «Ռեալն» առաջարկեց ինձ փոխանցել իմիջային իրավունքները, ես կապ հաստատեցի իմ անգլիացի խորհրդատուի հետ, իսկ հետո չմանրամասնեցի․ ինձ ամեն ինչ օրինական էր թվում: Չէի կարծում, որ դա կարող է որակվել որպես խարդախություն, չնայած եթե ես այստեղ եմ, կարծում եմ, որ ամեն ինչ այնքան էլ ճիշտ չի եղել: Ես մտածում էի միայն ակումբից 6 միլիոն մաքուր եկամուտ ստանալու մասին և ոչ մի հաղորդագրություն չէի ստանում այն մասին, որ դատախազությունն իմ դեմ հետաքննություն է սկսել»,- ասել է Կարլո Անչելոտին Մադրիդի նահանգային դատարանի նիստում:
