Մադրիդի «Ռեալը» վիճարկելու է Ջուդ Բելինգհեմի կարմիր քարտը «Օսասունայի» դեմ խաղում:
Լա Լիգայի 24-րդ տուրի խաղն ավարտվեց 1:1 հաշվով։
Հանդիպման առաջին խաղակեսում հանդիպման գլխավոր մրցավար Խոսե Մունուերա Մոնտերոն հայհոյելու համար խաղադաշտից հեռացրեց Բելինգհեմին։
Զեկույցում մրցավարը գրել է, որ Մադրիդի «Ռեալի» կիսապաշտպանն իրեն հայհոյել է։
Marca-ն հայտնում է, որ Մադրիդի «Ռեալը» մտադիր է բողոքարկել Բելինգհեմի հեռացումը, որպեսզի չեղյալ համարվի կիսապաշտպանի կարմիր քարտը, և արդյունքում խուսափեն հետագա որակազրկումից: Մադրիդցիները կարծում են, որ հանդիպման ժամանակ Բելինգհեմի խոսքերը չեն համապատասխանում մրցավարի զեկույցում տեղ գտած ձևակերպմանը։
Նախկինում հաղորդվում էր, որ Մադրիդի «Ռեալը» կարգապահական կոմիտեին կտրամադրի Movistar-ի հեռարձակման ձայնագրությունը, որում լսվում է, որ Բելինգհեմի խոսքերն ուղղված չեն մրցավարին։
Եթե Բելինգհեմի խոսքերը վիրավորական համարվեն, նա կարող է որակազրկվել չորսից 12 խաղով:
