Սպորտ
Կուբացի հսկան, որը նվաճեց օլիմպիական 5-րդ ոսկին՝ նվաճելով աշխարհը (ԼՈՒՍԱՆԿԱՐՆԵՐ)
Կուբացի Միխային Լոպեսը պաշտոնապես ըմբշամարտի աշխարհի պատմության մեծագույն ըմբիշն է։
Փարիզի Օլիմպիական խաղերում ավարտվել է հունահռոմեական ոճի ըմբշամարտի՝ մինչև 130 կգ քաշային կարգի մարզիկների պայքարը։ Եզրափակիչ գոտեմարտում միմյանց դեմ են մրցել համաշխարհային ըմբշամարտի լեգենդ, քառակի օլիմպիական չեմպիոն, կուբացի Միխային Լոպեսը և Չիլին ներկայացնող էթնիկ կուբացի Յասմանի Ակոստա Ֆերնանդեսը, որը փոխել էր մարզական քաղաքացիությունը Լոպեսի հետ հայրենիքում մրցակցելու անհնարինության պատճառով:
41-ամյա կուբացի հսկան 6:0 հաշվով վստահ հաղթանակի է հասել իր հայրենակցի նկատմամբ և դարձել ըմբշամարտի պատմության մեջ միակ հնգակի օլիմպիական չեմպիոնը:
Լոպեսը հաղթանակից հետո ցուցադրական հանել է իր ըմբշամարտի կոշիկները, համբուրել դրանք և դրել մրցագորգի կենտրոնում՝ սրանով խորհրդանշելով Փարիզի Օլիմպիական խաղերից հետո մեծագույն կարիերայի ավարտը։
Լոպեսը, մինչև 5-րդ օլիմպիական ոսկին, եղել է այն ութ մարզիկներից մեկը, որոնք 4 ոսկի էին նվաճել․ այժմ կուբացին մեկ հոգանոց էլիտար վարկանիշի և խմբի առաջատարն է։
Նվաճումներ
Ըմբշամարտի տղամարդկանց բոլոր ոճերի պատմության մեջ միակ հնգակի օլիմպիական չեմպիոնը (2008, 2012, 2016, 2020, 2024)։ Աշխարհի հնգակի չեմպիոն (2005, 2007, 2009, 2010, 2014) և աշխարհի առաջնությունների եռակի արծաթե մեդալակիր (2006, 2011 և 2015), համամերիկյան խաղերի հնգակի չեմպիոն (2003, 2007, 2011, 2015, 2019)։
Միխային Լոպեսը եղել է Կուբայի հավաքականի դրոշակակիրը 2008 թվականի Պեկինի, 2012 թվականի Լոնդոնի և 2016 թվականի Ռիո դե Ժանեյրոյի Օլիմպիական խաղերի բացման արարողություններում։
Հետաքրքիր փաստն այն է, որ Միխայինի ավագ եղբայրը՝ Միշել Լոպես Նունյեսը, զբաղվել է բռնցքամարտով և 2004 թվականի Աթենքի Օլիմպիական խաղերում գերծանր քաշային կարգում բրոնզե մեդալակիր է:
