Չավիին դուր չի եկել Ժոան Լապորտայի Մասին վանկարկումները «Բարսայի» երկրպագուների կողմից:
«Բլաուգրանայի» գլխավոր մարզիչը այս մասին խոսել է Լա Լիգայի «Ռայո Վալեկանոյի» հետ խաղից հետո:
Հաղորդվում էր, որ «Բարսելոնայի» նախագահը որոշել է մրցաշրջանի ավարտից հետո դադարեցնել համագործակցությունը գլխավոր մարզչի հետ ակումբում տնտեսական իրավիճակի մասին նրա հայտարարություններից հետո, չնայած, որ ապրիլի 25-ին ղեկավարը հայտարարել էր, որ Չավին մնում է: Ակումբը պետք է 20 միլիոն եվրո փոխհատուցում վճարի, եթե Չավին և նրա շտաբը հեռացվեն աշխատանքից։
«Ինձ դուր չի գալիս, երբ ակումբի ներկայացուցչին սուլում են կամ նրա մասին ինչ-որ վատ բան են երգում․ դա տհաճ է։ Ես շնորհակալ եմ երկրպագուներին, որոնք իմ մասին երգեր են երգում, վանկարկում իմ անունը։ Ես միշտ հարգանք եմ վայելել տրիբունաների կողմից և շատ շնորհակալ եմ նրանց դրա համար»։
«Չավի՝ այո, Լապորտա՝ ոչ» վանկարկումների մասին Չավին ասել է.
«Ինձ դա դուր չի գալիս։ Դա այն չէ, ինչ ես փնտրում եմ: Ես միշտ ձգտում եմ միասնության, կոնսենսուսի և փոխգործակցության, ուստի դա ինձ դուր չեկավ: Չեմ սիրում, երբ ինչ-որ մեկի վրա հարձակվում են, դա տհաճ է։ Ուզում եմ, որ բոլորը երջանիկ լինեն։ Նրանք վանկարկում են իմ անունը, և ես հարգանք եմ զգում, բայց ահա այդ երգերն ինձ դուր չեն եկել», - ասել է Չավին։
