Սպորտ
«Իտալիայի մրցաշարը կրկես էր հիշեցնում՝ մրցավարների աճպարարությամբ»․ ՀԲՖ նախագահ
Հայաստանի բռնցքամարտի ֆեդերացիայի նախագահ Հովհաննես Հովսեփյանը դժգոհ է Իտալիայում կայացած օլիմպիական վարկանիշային մրցաշարի մրցավարությունից։ Այս մասին նա գրել է Ֆեյսբուքի իր էջում։
«Սպորտում հաղթողին չեն դատում, բայց այն մարդիկ ու սպորտային կազմակերպությունները, որոնք անընդհատ խոսում են արդարության մասին, իրենք են խախտում արդարությունն ու անցնում բոլոր սահմանները` միաժամանակ զրոյացնելով բազմաթիվ մարզիկների ու մարզիչների տարիների աշխատանքն ու թափած քրտինքը։
Իտալիայում կայացած օլիմպիական վարկանիշային մրցաշարը մի մեծ կրկես էր հիշեցնում, որտեղ «արդար մրցավարներն» աչքի ընկան աճպարարական բարձր վարպետությամբ։ Վարկանիշային այս մրցաշարին մեր մարզիկները շատ լավ էին պատրաստվել ու մենք կարող էինք նվաճել առնվազն 3 ուղեգիր, բայց «արդար» մրցավարներն իրենց սև գործն արեցին։
Ռաֆայել Հովհաննիսյանի, Նարեկ Մանասյանի ու Գուրգեն Մադոյանի մասնակցությամբ սկզբունքային մենամարտերում մրցավարներն անհասկանալի ու անարդար ձևով առաջին իսկ ռաունդից առավելությունը տալիս էին մրցակցին` երաշխավորելով իրենց սև գործը։
Ես՝ որպես բռնցքամարտի Հայաստանի ֆեդերացիայի նախագահ և EUBC տնօրենների խորհրդի անդամ, դիմելու եմ բոլոր պատկան մարմիններին, որպեսզի բացատրություն տան մրցավարական նման անարդար գործողությունների համար, նաև պետք է քննության առնվեն այդ մենամարտերը»,- գրել է նա։
