«Մանչեսթեր Սիթին», «Բավարիան», Մադրիդի «Ռեալն» ու «Լիվերպուլը» հետաքրքրված են Խավի Ալոնսոյի ծառայություններով և հետևում են նրա գլխավորությամբ Լևերկուզենի «Բայերի« խաղին․ հաղորդում է BBC-ն:
Աղբյուրի տեղեկություններով՝ «քաղաքայինները» դիտարկում են իսպանացի մարզչի տարբերակը այն դեպքում, եթե Գվարդիոլան չերկարաձգի հաջորդ ամռանը ավարտվող պայմանագիրը: Ավելի վաղ հաղորդվում էր, որ Խավի Ալոնսոն «Լիվերպուլում» Յուրգեն Կլոպին փոխարինելու հիմնական թեկնածուն է: Գերմանացի մասնագետը ընթացիկ մրցաշրջանի ավարտից հետո կհեռանա մերսիսայդյան ակումբից։
Ալոնսոն գերմանական թիմի գլխավոր մարզիչ է դարձել 2022 թվականի հոկտեմբերին։ Ընթացիկ մրցաշրջանում «Բայերը» Բունդեսլիգայի անցկացրած 18 խաղից հետո 48 միավորով առաջնության առաջատարն է: Ընդ որում, իսպանացի մասնագետի գլխավորած թիմը դեռ ոչ մի անգամ չի պարտվել 2023/2024 մրցաշրջանում՝ տանելով 24 հաղթանակ և երեք անգամ ոչ-ոքի խաղալով:
