Սպորտ
Վազգեն Թևանյանը, Արսեն Հարությունյանն ու Արման Անդրեասյանը ոսկե մեդալներ են նվաճել
Եվրոպայի չեմպիոն, Աշխարհի եռակի գավաթակիր, Օլիմպիական խաղերի փոխչեմպիոն, ԽՍՀՄ սպորտի վաստակավոր վարպետ, ազատոճային ըմբիշ Ստեփան Սարգսյանի անվան Գավաթի 25-րդ խաղարկության մրցումային երկրորդ օրը Հայաստանի ներկայացուցիչները 3 ոսկե, 1 արծաթե և 1 բրոնզե մեդալներ են նվաճել, հայտնում է ՀՀ ԿԳՄՍՆ-ն։
Հանդես գալով 57 կգ քաշային կարգում՝ Արսեն Հարությունյանը ոսկե մեդալ է նվաճել՝ եզրափակչում 11-1 հաշվով վստահ հաղթանակ տանելով Վրաստանի ներկայացուցիչ Գեորգի Գեգելաշվիլիի նկատմամբ: 65 կգ քաշային Վազգեն Թևանյանը ոսկե մեդալի համար գոտեմարտում 48 վայրկյանում փայլուն հնարքներով հաղթել է Բուլղարիայի ներկայացուցիչ Միկյա Նաիմին (13-1), իսկ Արման Անդրեասյանը եզրափակչում 5-3 հաշվով կամային հաղթանակ է տոնել Ղազախստանի ներկայացուցչի նկատմամբ:
Հայաստանի մյուս ներկայացուցիչ, 74 կգ քաշային Հրայր Ալիխանյանը դարձել է արծաթե մեդալակիր՝ եզրափակչում զիջելով Մոլդովայի ներկայացուցչին:
Ազատոճային հայ ըմբիշներից բրոնզե մեդալի է արժանացել Մեժլում Մեժլումյանը՝ 61 կգ քաշայինների վճռորոշ գոտեմարտում առավելության հասնելով Ղազախստանի ներկայացուցչի նկատմամբ:
Ստեփան Սարգսյանի անվան Գավաթի 25-րդ խաղարկությանը մասնակցում են ավելի քան 15 երկրի ըմբիշներ: Մրցաշարի հաղթողը կստանա 3000, արծաթե մեդալակիրը` 2000, իսկ բրոնզե մեդալակիրը՝ 1000 ԱՄՆ դոլար: Նույնքան կստանա նաև չեմպիոնի մարզիչը: Մրցումները նախընտրական են Սերբիայում կայանալիք աշխարհի առաջնության համար, որը վարկանշային է Օլիմպիական խաղերի համար:
