«Ռեալը» չի պատրաստվում հեռացնել Կարլո Անչելոտիին, սակայն ակումբում դժգոհ են Լա Լիգայի արդյունքներից:
Ինչպես գրում է As-ը, հաջորդ շաբաթ Ֆլորենտինո Պերեսը կհանդիպի Կարլո Անչելոտիի հետ, որպեսզի քննարկի հաջորդ մրցաշրջանի ծրագրերը: «Ռեալի» նախագահն առաջին ձեռքից է ցանկանում իմանալ, թե ինչն է հուզում մարզչին:
Այս պահին «Մադրիդում» չեն կասկածում, որ Անչելոտին կշարունակի մինչև 2024թ․ գործող պայմանագրի ավարտը: Սակայն Կառլոն նախկինի պես աշխատանքի առաջարկ ունի Բրազիլիայի հավաքականից, ուստի Պերեսի հետ անձնական հանդիպման ժամանակ մարզիչը պետք է հաստատի «Ռեալում» մնալու մտադրությունը:
«Ռեալի» ղեկավարությունը կարծում է, որ այս մրցաշրջանում թիմը հիանալի հանդես եկավ Իսպանիայի գավաթում, ընդունելի խաղաց Չեմպիոնների լիգայում և վատ հանդես եկավ առաջնությունում:
Նշվում է, որ «Ռեալում» անընդունելի են համարում այն, որ թիմը չեմպիոնության համար պայքարը դադարեցրել է ավելի քան մեկ ամիս առաջ: Մարզչական շտաբից չեն պահանջում մշտական հաղթանակներ բոլոր մրցաշարերում, սակայն ղեկավարությունը ցանկանում է, որ թիմը պայքարի գավաթների համար: Չեմպիոնների լիգայում դա հաջողվեց, Լա Լիգայում՝ ոչ։ Սա Անչելոտիից գլխավոր պահանջն է եղել։
