«Ոսկե գնդակի» յոթակի դափնեկիր Լիոնել Մեսսիի հայրը՝ Խորխե Մեսսին, որը նաև նրա գործակալն է, մոտ ժամանակներս պետք է հանդիպի «Ինտեր Մայամիի» սեփականատեր Խորխե Մասի հետ․ հայտնում է լրագրող Ջանլուկա Դի Մարցիոն:
Երեքշաբթի օրը զլմ-ները հայտնել էին, որ ՊՍԺ‑ն ֆուտբոլիստին երկու շաբաթով հեռացրել է մարզումներից՝ Սաուդյան Արաբիա չհամաձայնեցված այցի պատճառով: Ենթադրվում է նաև, որ փարիզյան ակումբը որոշել է օգտվել հարձակվողի հետ պայմանագիրը չերկարաձգելու հնարավորությունից։
Նշվում է, որ ՄԼՍ-ի ակումբը վերջին ամիսներին արդեն բանակցություններ էր վարում խաղացողի ներկայացուցիչների հետ՝ փորձելով նախնական պայմանագիր կնքել, սակայն այն այդպես էլ չստորագրվեց:
Նշենք, որ ընթացիկ մրցաշրջանում 35-ամյա արգենտինացին մասնակցել է 37 հանդիպման, դարձել 20 գոլի և 19 գոլային փոխանցման հեղինակ:
