Սպորտ
Ծանրամարտի Եվրոպայի առաջնությունը Երևանում անցկացնելը՝ պատմական իրադարձություն
ՀՀ վարչապետի աշխատակազմի ղեկավար Արայիկ Հարությունյանն ու ՀՀ ԿԳՄՍ նախարարի տեղակալ Կարեն Գիլոյանն այսօր ասուլիսում անդրադարձել են ծանրամարտի Եվրոպայի առաջնության՝ ՀՀ-ում անցկացման աշխատանքներին։
Գիլոյանն այդ առաջնությունը ՀՀ-ում հյուրընկալելը պատմական արդարության վերականգում է համարել. «Այսօր պատմական իրադարձություն է տեղի ունենում Հայաստանում: Ճիշտ 40 տարի առաջ մարզահամերգային համալիրը պետք է բացվեր, և այստեղ պետք է անցկացվեր ծանրամարտի Եվրոպայի և աշխարհի առաջնությունը: Հիմա` 40 տարի անց, մարզահամերգային համալիրին վերադարձնում ենք իր պատմական առաքելությունը: Այն ընդունելու է Եվրոպայի առաջնությունը»։
Ըստ նրա՝ Հայաստանը պետք է հյուրընկալի նմանատիպ մրցաշար, քանի որ ծանրամարտի Հայաստանի հավաքականը լավագույններից մեկն է աշխարհում և այս մրցաշարին էլ չի մասնակցելու պարզապես մասնակցության համար:
Արայիկ Հարությունյանն էլ Եվրոպայի առաջնությունը Երևանում անցկացնելը համարել է 2023 թվականի բացառիկ իրադարձություն. «2023 թվականին ամենակարևոր հանրային իրադարձություններից մեկը լինելու է ծանրամարտի Եվրոպայի առաջնությունը: Մարտի 17-ին Հյուսիսային պողոտայում կտեղադրվի առաջնության հետհաշվարկի ժամացույցը: Եվրոպայի առաջնությունը վարկանիշային է Օլիմպիական խաղերի համար, ինչը մեծացնում է հետաքրքրությունը այս մրցաշարի նկատմամբ: Հայաստան են գալու Եվրոպայի ամենաուժեղ մարզիկները»։
Նրա խոսքով` նմանատիպ մրցաշարերը բարձրացնում են Հայաստանի վարկը սպորտային աշխարհում. «Նմանատիպ մրցաշարեր ընդունելու հայտերը ներկայացնելիս՝ մենք ֆեդերացիաներին ասում ենք, որ անելու ենք առավելագույնը և նոր նշաձող ենք սահմանելու: Դա արել ենք նախորդ տարի` բռնցքամարտի Եվրոպայի առաջնության դեպքում»։
