Սպորտ
Ֆրանսիայի ֆուտբոլի ֆեդերացիայի նախագահը ներողություն է խնդրել Զիդանի մասին ասված խոսքերի համար
Երեկ Ֆրանսիայի ֆուտբոլի ֆեդերացիայի ղեկավարը հայտարարել է. «Եթե Զիդանը զանգի, ես հեռախոսը նույնիսկ չեմ վերցնի։ Միգուցե նրա համար մրցույթ կազմակերպվի, որ աշխատանք գտնի»։
Այս խոսքերի համար Լե Գրեն քննադատվել է մի շարք անվանի մարզիկների, պաշտոնյանների և ակումբների կողմից։ ՊՍԺ-ի հարձակվող Կիլիան Մբապեն գրել է. «Զիդանը Ֆրանսիան է։ Մի արհամարհեք լեգենդին»: Ֆրանսիայի սպորտի նախարար Ամելի Ուդեա-Կաստերան պաշտոնյային կոչ է արել ներողություն խնդրել։ «Ռեալը» ևս դատապարտել է Լե Գրեի խոսքերը։
Այսօր ՖՖՖ նախագահը ներողություն է խնդրել Զիդանի մասին խոսքերի համար։
«Ես կցանկանայի ներողություն խնդրել այս արտահայտությունների համար, որոնք բացարձակապես չեն արտացոլում իմ մտքերի ընթացքը, ինչպես նաև ոչինչ չեն արտահայտում իմ վերաբերմունքի մասին, թե ինչպիսի խաղացող է եղել Զիդանը և ինչպիսի մարզիչ է դարձել։
Ես «RMC»-ին հարցազրույց տվեցի, որը չպետք է տայի, քանի որ դրա ընթացքում նրանք փորձեցին հակասություններ առաջացնել և Դիդյե Դեշամին հակադրել Զինեդին Զիդանին: Սրանք ֆրանսիական ֆուտբոլի երկու հիմնասյուներն են։
Ես ընդունում եմ, որ անփույթ եմ գտնվել, որոնք հանգեցրել են թյուրիմացությունների: Զինեդին Զիդանը գիտի, որ ես, ինչպես և ողջ ֆրանսիացի ժողովուրդը, նրան վերաբերվում ենք անսահման հարգանքով», -ֆեդերացիայի ղեկավարի խոսքերն է մեջբերել «Ֆրանս-պրես»-ը։
