Տնտեսագետ Հայկազ Ֆանյանը «Ֆեյսբուքի» իր էջում գրել է․
«Այս օրերին մի շատ կարևոր իրադարձություն է տեղի ունենում, որը, կարծես, պատշաճ չի լուսաբանվում մամուլի կողմից։ Խոսքը ԼՂՀ կառավարության, իրավաբանական և ֆիզ․ անձանց՝ ՀՀ ֆինանսաբանկային համակարգին ունեցած պարտավորությունների մասնակի ստանձնումն է ՀՀ կառավարության կողմից։
Պարզ ասած՝ ԼՂՀ կառավարությունը, իրավաբանական և ֆիզ․ անձինք ՀՀ ֆինանսաբանկային համակարգին վարկերի և պարտատոմսերի տեսքով պարտք են 315 մլրդ դրամ, որից 268 մլրդ դրամը բաժին է ընկնում ԼՂՀ կառավարությանը և նրա ստեղծած հիմնադրամներին։
Որոշվել է այս պարտքը 30%/70% հարաբերությամբ բաժանել առևտրային բանկերի և ՀՀ կառավարության միջև, ինչի նպատակով, նախատեսվում է, 225 մլրդ դրամի գանձապետական պարտատոմս պիտի թողարկվի։ Սա թեև արդար, բայց բավականին ծախսատար որոշում է, ինչը կհանգեցնի ՀՀ կառավարության պարտքի կտրուկ աճի՝ 5.2%-ով»։
