Քաղաքական մեկնաբան Հակոբ Բադալյանը «Ֆեյսբուքի» իր էջում գրել է.
«Վրաստանի վարչապետ Ղարիբաշվիլիի՝ Չինաստան կատարած այցի ընթացքում հայտարարվել է Պեկին-Թբիլիսի ռազմավարական գործակցության մասին: 2024թ․ պառլամենտական ընտրությանն ընդառաջ Վրաստանի գործող իշխանությանը Չինաստանն անհրաժեշտ է արևմտյան ուժգնացող ճնշմանը դիմակայելու համար, հատկապես, երբ որոշակի տեղատվություն է Էրդողան-Պուտին հարաբերությունում:
Հատկանշական է, որ հենց Բաթումիում տեղի ունեցան բողոքի ակցիաներ Ռուսաստանից ժամանած զբոսանավի դեմ: Անկասկած է, որ Վրաստանի հանդեպ Թուրքիայի ազդեցության «ծանրության կենտրոնը» հենց Աջարիան է:
Իհարկե, հնարավոր է՝ Պուտինն ու Էրդողանը օգոստոսին պայմանավորվեն: Ռուսաստանի համար առանցքային հարցը Շվեդիան է, իհարկե, որպեսզի Անկարան այդ երկրի՝ ՆԱՏՕ-ին անդամությանը հավանություն տալու հարցում խոսքից չանցնի գործի: Մեծ հավանականությամբ հենց այդպես էլ կլինի: Բայց Ռուսաստանի համար կարևոր է նաև Վրաստանը: Դեռևս 44-օրյա պատերազմից հետո մի շարք անգամներ գրել եմ կարծիքս, որ նոր ստատուս-քվոյի պայմաններում ռեգիոնալ ազդեցության համար առանցքային դիմակայությունը լինելու է Վրաստանի ուղղությամբ:
Ավելին, գուցե տարօրինակ հնչի, բայց հենց Արցախի պատերազմն էր, որ Վրաստանի իշխանությանը թույլ տվեց համեմատաբար հանգիստ հաղթել 2020-ի աշնանային խորհրդարանական ընտրությանը: Աշխարհաքաղաքական ուշադրության ահռելի մասը կենտրոնացած էր հայ-ադրբեջանական ուղղությամբ:
Այժմ Թբիլիսիի՝ 2024 թվականի հետ կապվող հույսը թերևս Չինաստանն է: Հայաստանի համար առավել հավասարակշռված տարբերակը կլինի այն, որ Չինաստանն արդարացնի այդ հույսը»:
