Տեսակետ
Ադրբեջանի քաղաքացին չի կարող քշել Ֆիզուլի և «պիկնիկի» նստել Վարանդայի ջրամբարի ափին
ԼՂՀ ԳԽ նախկին պատգամավոր, հրապարակախոս Վահրամ Աթանեսյանը «Ֆեյսբուքի» իր էջում գրել է.
«Պատերազմից երկուսուկես տարի անց Ադրբեջանը միայն պետական թույլտվությամբ է արտոնում «ազատագրված տարածքներ» այցը։ Ադրբեջանի քաղաքացին, պարզ ասած՝ չի կարող առավոտյան արթնանալ, գործարկել մեքենան և քշել, ասենք, Ֆիզուլի և «պիկնիկի» նստել Վարանդայի ջրամբարի ափին։ Բաբելոնյան ինչ խառնակություն էր տիրում, երբ այդ տարածքները մեր վերահսկողության տակ էին՝ ցավոտ է հիշեցնել։ Փաստ է, որ ինչքան, ղարաբաղցու ասած՝ «մորից խռոված» կար, կարող էր ոչ միայն մինչև դիրքապահ խրամատներ հասնել, այլև լուսանկարել, տեսանկարահանել և հանգիստ տարածել համացանցի «սարդոստյանում»։
Ես չգիտեմ՝ Հայաստանի ԱԺ-ում հավատարմագրված լրագրողին ով է «թմրանյութ» մատակարարում, բայց երբ նա խորհրդարանի փոխխոսնակին հարցնում է «Դուք ի՞նչ թմրանյութ եք օգտագործում», արդեն իսկ աղետ է։ Այդպես չեն պայքարում։ Միայն հանձնվում են։ Ինչպես մեկ տասնամյակ բանակի կերպարը ներկայացնում էին շարքային Ջամշոյանով, հայրենասիրությունը՝ «Դիրքերում» հաղորդաշարով։
