«Հարվածի արդյունքում վտանգը չեզոքացվել է». դաշնակցական պատգամավորի փաստաբան
Սոցցանցեր
31 Մարտի, 15:09
Փաստաբան Ռուբեն Մելիքյանը իր «Ֆեյսբուքի» էջով տեղեկացրել է, որ ստանձնել է դաշնակցական ընդդիմադիր պատգամավոր Մհեր Սահակյանի պաշտպանությունը։
«Ստանձնել եմ ձերբակալված ընդդիմադիր պատգամավոր Մհեր Սահակյանի պաշտպանությունը։ Այս պահին նա գտնվում է ոստիկանության Արաբկիրի բաժնում, շուտով հավանաբար կտեղափոխվի Երևանի քննչական (Պարույր Սևակի փողոց):
Լիազորված եմ հանրությանը ներկայացնել Մհեր Սահակյանի պարզաբանումը միջադեպի կապակցությամբ. պետաիրավական հանձնաժողովի փակ նիստի ժամանակ քպ-ական պատգամավոր, հանձնաժողովի նախագահ Վ. Վարդանյանը ընդդիմադիր պատգամավորների նկատմամբ դրսևորել է ագրեսիվ վարքագիծ, իսկ Մհեր Սահակյանը խոսքով արձագանքել է այդ վարքագծին։ Այնուհետ քպ-ական նույն պատգամավորը նստած տեղից կանգնել է ու քայլել Մհեր Սահակյանի ուղղությամբ։ Հաշվի առնելով ԱԺ քպ-ական մի շարք պատգամավորների կողմից ընդդիմադիրների նկատմամբ անպատիժ ձևով ֆիզիկական ուժ կիրառելու, նրանց վրա անպատիժ ձևով հարձակվելու հարուստ փորձը՝ Մհեր Սահակյանը իրավիճակը գնահատել է այնպես, որ Վարդանյանի կողմից առկա է իրեն հարվածելու իրական վտանգ, և, ինքնապաշտպանության նկատառումով, նրան հասցրել է մեկ հարված։ Հարվածի արդյունքում վտանգը չեզոքացվել է։ Հայհոյանքներ չեն հնչել, այլ հարվածներ չեն եղել»,- այս մասին մասվում է նրա «ֆեյսբուքյան» գրառման մեջ։
