Տեսակետ
Արդարացված չէ սպասել, մինչև ծառի բունն այնքան փտի, որ ինքնուրույն ընկնի և վնասի մարդկանց. Խաժակյան
Երևանի ավագանու «Լույս» խմբակցության անդամ Դավիթ Խաժակյանը «Ֆեյսբուքի» իր էջում գրել է.
«Երևանի բնակիչների աչքը սովոր է տեսնել հատվող առողջ ծառեր, որոնք փոխարինվում են կոմերցիոն կառույցներով։ Այսօրվանից Երևանի կենտրոնում մեկնարկել են անառողջ ծառերի հատման աշխատանքները, որոնք փոխարինվելու են տվյալ հատվածում տնկման համար ավելի նպատակահարմար ծառատեսակներով։
Ֆեյսբուքյան որոշ օգտատերերի էջերում տեսնում եմ հարցադրումներ և մտահոգություններ։ Նախ, պետք է ասեմ, որ սա երկար քննարկված և ուսումնասիրված հարց է՝
- Հատվող ծառերը ստացել են մասնագետների կողմից եզրակացություններ առ այն, որ դրանք կենսունակ ծառեր չեն,
- Այդ ծառերը թթվածնի արտադրության իրենց ֆունկցիան այլևս չեն կատարում,
- Բազմաթիվ ծառատեսակներ ունեն սահմանափակ ժամանակային կենսունակություն, և սպասել, մինչև ծառի բունն այնքան փտի, որ ինքնուրույն ընկնի և վնասի մարդկանց ու նրանց գույքը, արդարացված չէ,
- Սա բավական աշխատատար գործ է, քանզի բնաբաժակները պետք է փորվեն, և տեղադրվեն նոր և որակյալ ծառեր,
- Ի պատասխան այն «կասկածների», թե այս պրոցեսում խնդիր է դրված նոր գնված ծառերի «իրացումն» ապահովել, պետք է ասեմ, որ այս փաստարկը անգամ տրամաբանական չէ։ Քաղաքում կան մեծ և ազատ մակերեսներ, որտեղ կարելի է իրականացնել այդ «իրացումը» և ծախսել շատ ավելի քիչ ռեսուրս, քանզի բնաբաժակներն ազատելու խնդիր այնտեղ չկա։ Եվ, ի վերջո «իրացման» նենգ նպատակը փոքր Կենտրոնում իրականացնելը ողջամիտ չէ, քանի որ այն բոլորի ուշադրության կենտրոնում է, և հիմնարկը պատասխանատու է յուրաքանչյուր հատիկ տնկվող ծառի աճողականության համար»։
