Քաղաքական մեկնաբան Հակոբ Բադալյանը «Ֆեյսբուքի» իր էջում գրել է.
«Միամիտ կլինի մտածել, թե «անջատելով» Արցախի խնդիրը Հայաստան-Ադրբեջանից՝ մենք ազատվելու ենք Սյունիքի հարցում մարտահրավերներից:
Ընկերներ, ռեգիոնի գլխավոր հարցը Սյունիքն է, որովհետև մեծ ռեգիոնի հիմնարար հարցը Իրանն է: Նախ, մեզ թույլ չեն տալու «ազատվել» Արցախի խնդրից, ինչպես թույլ չեն տվել անցնող երեք տասնամյակում, և անգամ որևէ դասավորությամբ «թույլ» տալու պարագայում մեզ չեն ազատելու Սյունիքի հարցից՝ առնվազն քանի դեռ լուծված չէ Իրանի հարցը:
Մեր մշակումները պետք է անենք՝ ելնելով այդ «մեկնակետից»: Այլ խնդիր է, թե Սյունիքի հարցում ինչ ռազմավարությունների է բախվում Հայաստանը կարճաժամկետ ու երկարաժամկետ հեռանկարում: Բայց սա էլ զգալիորեն «փոփոխական» է, որովհետև մեծապես կախված է, թե ինչ տրամաբանությամբ կզարգանա իրավիճակն Իրանի շուրջ»:
