Տեսակետ
Հայկական կողմը պետք է քննարկման առարկա դարձնի ՅՈՒՆԵՍԿՕ-ի՝ Ադրբեջանի վերաբերյալ ընդունած որոշումները
ԼՂՀ ԱԺ նախկին պատգամավոր, քաղաքական վերլուծաբան Վահրամ Աթանեսյանը «ֆեյսբուքի» իր էջում գրել է․
«Ադրբեջանցի վտարանադի կոնֆլիկտաբան Արիֆ Յունուսովը սենսացիոն բացահայտում է արել, որ Մեհրիբան Ալիևան ՅՈՒՆԵՍԿՕ-ի բարի կամքի դեսպանի կոչումից հրաժարվել է կոռուպցիոն գործարքի բացահայտման պատճառով։ Ըստ Յունուսովի՝ երբ ՅՈՒՆԵՍԿՕ-ն Ադրբեջանին նվիրված որևէ միջոցառում էր կազմակերպում, ամեն անգամ կառույցի գլխավոր տնօրեն, բուլղարուհի Իրինա Բոկովայի ամուսնու՝ Կալին Միտրովի բանկային հաշվին Բաքվից փոխանցվում էր 100-200 հազար եվրո։ Բոկովան, որ զբաղեցրած պաշտոնում ընդհանուր առմամբ վաստակել է 790 հազար դոլար, Նյու-Յորքում ձեռք է բերել 2,4 միլիոն դոլար արժեցող բնակարան՝ վճարելով առձեռն։ Գործարքը բացահայտվել է, և ՅՈՒՆԵՍԿՕ-ում Մեհրիբան Ալիևային խորհուրդ են տվել հրաժարական տալ՝ խուսափելու աղմկոտ բացահայտումներից։ Յունուսովի այս գրառումը պետք է հնարավորինս լայն տարածվի, հայկական կողմը կարող է խորհրդակցել համապատասխան մարմինների հետ, որպեսզի քննարկման առարկա դառնա ՅՈՒՆԵՍԿՕ-ի՝ Ադրբեջանի վերաբերյալ ընդունած որոշումների օրինականության, ինչպես նաև քառասունչորսօրյա պատերազմից հետո ադրբեջանական օկուպացիայի տակ հայտնված հայկական մշակութային ժառանգության նկատմամբ այդ կառույցի անտարբերության հարցը»։
